Cun l'emprima badigliada uffiziala cumenza il 1. da settember 2025 la construcziun dal sviament da La Punt, ch'è naschì avant passa 40 onns sco visiun. Uschia è cuntanschì in pass impurtant per meglierar la situaziun da traffic e per augmentar la qualitad da viver en il vitg. Las lavurs da construcziun dal project dad 80 milliuns duran circa 8 onns.

Cun la construcziun dal sviament vegn la stretga en il center dal vitg deliberada dal traffic da transit. Quai augmenta la segirezza per las persunas ch'èn da viadi a pe u cun il velo, ma er per il traffic local. Plinavant meglierescha il sviament fermamain la qualitad da viver e d'abitar a La Punt Chamues-ch. «In sviament sco quel na chaschuna naginas lingias grossas sco in project grond a Turitg. El è dentant impurtant per ina vischnanca, per ina regiun e per la glieud che crescha si, che viva e che lavura qua», accentuescha la cussegliera guvernativa Carmelia Maissen, scheffa dal Departament d'infrastructura, energia e mobilitad, en ses pled a chaschun da l'emprima badigliada. «Cun manar il traffic da transit or dal center dal vitg, dain nus enavos insatge al vitg: quietezza, segirezza, identitad, libertad concepziunala.»

Lunga istorgia
Er per l'inschigner chantunal Reto Knuchel è il di dad oz in term impurtant: «Suenter passa 40 onns è oz il di, nua ch'ils plans daventan realitad.» Gia il cumenzament dals onns 1980 aveva l'Uffizi da construcziun bassa elavurà in emprim project per in sviament da La Punt. Sin fundament da las prioritads finanzialas ch'ins aveva stuì metter en la planisaziun da l'infrastructura, n'è il sviament da La Punt betg vegnì realisà per entant. Auters projects da sviament – sco quels da Trin, Flem, Silvaplauna u per lung da la via dal Partenz tranter Landquart e Tavau – èn vegnids classifitgads sco pli urgents.

Realisaziun en etappas fin a l'avertura 2033
L'entir project da sviament ha ina lunghezza dad 1,9 kilometers. In tunnel da 584 meters lunghezza – l'element central dal project – passa sut il center dal vitg da La Punt Chamues-ch ora. Ils custs dal sviament da La Punt importan 80 milliuns francs. Las lavurs da construcziun èn divididas en pliras etappas e duran previsiblamain 8 onns. Anc quest onn vegnan endrizzadas las plazzas d'installaziun als dus portals dal tunnel. L'onn 2026 vegn fatg l'entagl preliminar en il territori Arvins.

Fegl d'infurmaziun dal UCB cun infurmaziuns detagliadas
Il pli nov fegl d'infurmaziun dal UCB cuntegna infurmaziuns detagliadas davart il nov trassé dal sviament da La Punt sco er chaussas interessantas davart las singulas etappas da construcziun fin l'onn 2033.

Fotografias agiuntadas:

Plan da survista dal sviament da La Punt

La Punt Chamues-ch ord vista da la via dal Pass da l'Alvra. ©Fabian Gattlen, Engiadina San Murezzan turissem.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 15.00 fin las 16.00), e‑mail Carmelia.Maissen@diem.gr.ch
• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 15.00 fin las 16.00), e‑mail Reto.Knuchel@tba.gr.ch

Responsabladad: Uffizi da construcziun bassa