En il rom dal dialog regular cun il chantun Grischun ha la Regenza grischuna retschavì oz il cusseglier federal Ignazio Cassis a Rehanau. Il discurs cun il minister da l'exteriur ha dà l'occasiun da sclerir differents giavischs dal chantun Grischun e d'approfundar temas transcunfinals.
Il discurs dad oz cun il cusseglier federal Ignazio Cassis è gia stà l'otgavel barat uffizial cun la Regenza grischuna dapi sia entrada en uffizi l'onn 2017. Quella giada aveva il minister da l'exteriur cumenzà in dialog politic regular cun il Grischun per discutar las sfidas ed ils giavischs particulars dal chantun triling e per rinforzar il barat d'infurmaziuns tranter il Cussegl federal e la Regenza.
Temas transcunfinals e la plurilinguitad en il focus
Il dialog politic ha cumenzà cun in barat davart il concept da traffic per ils gieus olimpics a Milaun-Cortina 2026 sco er davart la realisaziun da la Cunvegna davart l'imposiziun dubla da taglia per cunfinarias e cunfinaris. Plinavant ha il cusseglier federal Ignazio Cassis infurmà la Regenza grischuna davart ils pli novs svilups en las relaziuns tranter la Svizra e l'Uniun europeica.
«Il dialog politic regular cun la Regenza grischuna è in inscunter indispensabel ed in exempel, co che la collavuraziun tranter la Confederaziun ed ils chantuns po vegnir rinforzada. Cun il chantun Grischun part jau la passiun per nossa plurilinguitad. Ella è in avantatg prezius, che ans permetta da far punts tranter il sid ed il nord da las Alps, cun ils pajais vischins ed er en general sin plaun internaziunal», ha accentuà il cusseglier federal Ignazio Cassis.
En il center dal dialog dad oz èn stads ulteriurs temas d'interess cuminaivel, sco la proxima ediziun da la «Emna rumantscha» internaziunala sco er il program «Piccolo Erasmus», che cumpiglia il barat da collavuraturas e collavuraturs tranter las administraziuns chantunalas dal Grischun e dal Tessin d'ina vart e dal Departament federal d'affars exteriurs (DFAE) a Berna da l'autra vart.
Fotografias agiuntadas:
Ulteriuras fotografias da la scuntrada dal Departament federal d'affars exteriurs (DFAE)
Infurmaziuns:
President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
Responsabladad: Regenza