Suenter che las votantas ed ils votants da Tavau han refusà l'engrondiment dal Museum Kirchner, èn s'avertas novas perspectivas per il Museum d'art dal Grischun a Cuira. Ensemen cun il collectader èsi vegnì concludì, che 73 ovras d'artistas ed artists renumads vegnan messas a disposiziun al Museum d'art dal Grischun sco emprest permanent.

La collecziun Ulmberg cumpiglia ovras extraordinarias da la moderna classica e vala sco ina da las pli impurtantas collecziuns privatas da ses gener en l'Europa. Ella cuntegna ovras d'artistas ed artists che han ina stretga colliaziun cun Ernst Ludwig Kirchner e cun il moviment expressiunistic, per exempel Max Beckmann, Emil Nolde, Lyonel Feininger u Louise Bourgeois, sco er ovras da la moderna classica. Cumplettada vegn la collecziun cun ovras impurtantas da l'art concret e da l'art contemporan. Perquai ch'il project d'engrondir il Museum Kirchner a Tavau ha fatg naufragi, n'èsi betg pussaivel d'exponer là las ovras, sco planisà oriundamain. En stretga coordinaziun cun il collectader d'art renumà Uwe Holy han ins ussa chattà ina nova soluziun. Il collectader metta a disposiziun 73 ovras al Museum d'art dal Grischun sco emprest permanent. Il deposit cumenza cun la mort dal collectader e duai star a disposiziun al Museum d'art dal Grischun durant almain 20 onns. Circa in terz da la collecziun duai vegnir mussà permanentamain u mess a disposiziun al Museum Kirchner a Tavau sco sutemprest.

L'emprest permanent excepziunal rinforza l'attracziun naziunala ed internaziunala dal Museum d'art dal Grischun ed è in gudogn impurtant per la cuntrada artistica e culturala grischuna. «Nus ans legrain da quest enritgiment cultural remartgabel ed engraziain cordialmain ad Uwe Holy per la gronda confidenza en il chantun Grischun ed en il Museum d'art dal Grischun», declera il cusseglier guvernativ Jon Domenic Parolini.

Ultra da l'emprest permanent ha il chantun Grischun, respectivamain il Museum d'art dal Grischun, er dastgà retschaiver ina donaziun impurtanta da la collecziun Ulmberg. I sa tracta dal maletg «Alphütten und Tinzenhorn», in maletg en ieli da l'artist Ernst Ludwig Kirchner (1880–1938). A partir da la fin da l’onn 2026 vegn questa ovra ad enritgir la collecziun d'art dal museum.

Fotografia agiuntada:

foto 2 / © Yanik Bürkli GmbH
da sanestra a dretga: Cusseglier guvernativ Jon Domenic Parolini, collectader d'art Uwe Holy, Stephan Kunz, directur artistic dal Museum d'art dal Grischun, Sabine Kaufmann, presidenta da la fundaziun Collecziun grischuna d'art

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 44 66 (cuntanschibel da las 11.00 fin las 11.30), e‑mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient