Ord vista da la politica mundiala stattan las stentas per diversitad, egualitad ed inclusiun mal. Quest svilup sentan ins er en il Grischun. Ma a lunga vista vali d'investir economicamain e socialmain en la diversitad. Co pon las interpresas identifitgar schanzas, vegnir a frida cun resistenza e promover ina cultura inclusiva malgrà il cuntravent? Questa dumonda sa tschenta l'occurrenza «Diversity – ussa pir da dretg!» ils 29 da settember 2025 en la Werkstatt a Cuira.

L'egualitad e l'inclusiun rinforzan la forza innovativa, la cumpetitivitad e la forza da resistenza d'interpresas. Quai è cumprovà suffizientamain tras la scienza e tras l’experientscha. Ord vista da la politica mundiala para quest fatg actualmain dad esser irrelevant: La Regenza dals Stadis Unids scumonda a las autoritads americanas da sustegnair tals programs u da mantegnair relaziuns da fatschenta cun firmas che fan quai. Uschia han numerusas interpresas – en vista a lur fatschenta cun ils Stadis Unids – stritgà lur programs da diversitad, lur finamiras da diversitad u almain noziuns respectivas specificas dals rapports d'interpresas. Er en Svizra. Il Grischun na resta betg schanegià da quest svilup.

Resistenza sco schanza
Quest svilup è fatal – betg mo per stentas d'egualitad, mabain er per la societad e per l'economia en general. «Gist en temps da tensiuns socialas e politicas è ina cultura d'interpresa inclusiva in garant per stabilitad e per forza da resistenza», accentuescha Susanna Mazzetta dal Post da stab per l'egualitad da las schanzas per dunnas ed umens dal Grischun. Co pon interpresas identifitgar questas schanzas, ir enturn cun resistenza e promover ina cultura inclusiva malgrà il cuntravent? L'occurrenza «Diversity – ussa pir da dretg. Co che interpresas nizzegian activamain e strategicamain schanzas» sa tschenta questa dumonda: glindesdi, ils 29 da settember 2025, a partir da las 17.00, en la Werkstatt a Cuira.

Persunalitads multifaras da l'economia e da la politica discutan sin il podium: Cusseglier naziunal Jon Pult, deputada Nora Saratz Cazin, presidenta communala da Puntraschigna, Stefan Gal, co-manader da DE&I Swisscom, Martina Müller-Kamp, manadra prestaziuns da martgà e commembra da la direcziun da la Banca chantunala grischuna, sco er Carmen Scheuber, manadra sales & marketing e commembra da la direcziun da dhp Technology SA. Moderada vegn la discussiun da Michel Rudin, fundatur e mainagestiun da Swiss Diversity. L'occurrenza permetta discurs inspirants e novs impuls, tranter auter a chaschun da l'apero suandant. La participaziun è gratuita. In'annunzia sut www.diversity-gr.ch facilitescha la planisaziun.

Purtada da raits
L'occurrenza è ina cooperaziun da Diversity-gr, da la rait grischuna per e da las interpresas en il chantun Grischun, e da la plattafurma naziunala Swiss Diversity cun la visiun da promover la diversitad, l'egualitad e l'inclusiun en tut lur furmas.

Infurmaziuns:

Susanna Mazzetta, collavuratura giuridica, Post da stab per l'egualitad da las schanzas per dunnas ed umens, tel +41 81 257 35 72 (cuntanschibla da las 10.00 fin las 12.00) e‑mail Susanna.Mazzetta@stagl.gr.ch

Responsabladad: Post da stab per l'egualitad da las schanzas per dunnas ed umens