Sin invitaziun da la Regenza grischuna ha la Regenza dal chantun Schaffusa visità ier ed oz il chantun Grischun.

A chaschun da sia visita en il chantun Grischun è la delegaziun da Schaffusa vegnida manada dal president da la Regenza Martin Kessler. El è vegnì accumpagnà da la cussegliera guvernativa Cornelia Stamm Hurter, dals cussegliers guvernativs Dino Tamagni, Marcel Montanari e Patrick Strasser sco er dal chancelier Stefan Bilger. La commembra ed ils commembers da la Regenza da Schaffusa èn vegnids beneventads cordialmain er en preschientscha d'intginas partenarias.

Suenter il bainvegni uffizial dals giasts tras la Regenza cumpletta en la Chasa grischa a Cuira èn las duas delegaziuns viagiadas ier a Tusaun. Là è ina visita da la chavorgia da la Viamala stada sin il program. Suenter èsi ì vinavant cun il bus a Ziràn ad ina visita guidada en la baselgia da Son Martin. L'ultima staziun dal di è stada Savognin, nua ch'ils giasts han la finala pernottà en il Berghuus Radons.

Il di dad oz ha cumenzà cun in viadi cun bus fin Mulegns e lura cun ina visita da la Tur alva. Silsuenter èn las duas delegaziuns viagiadas cun bus a Cazas, ad in referat da prof. dr. Rico Franc Valär en la clinica Beverin davart l'impurtanza dal rumantsch e dal talian en il chantun Grischun. Avant il viadi da return a Schaffusa ha in gentar cuminaivel cumplettà la visita.

La visita da la Regenza dal chantun Schaffusa ha servì en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.

Fotografias agiuntadas:

Il president da la Regenza Marcus Caduff cun il president da la Regenza Martin Kessler

Las delegaziuns dal Grischun e da Schaffusa davant la Tur alva a Mulegns / Foto 2 / Foto 3

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch

Responsabladad: Regenza