La Regenza ha approvà la revisiun parziala da las disposiziuns executivas tar la Lescha davart ils supplements da famiglia. L'ordinaziun duai entrar en vigur il 1. da schaner 2026. Cun questa revisiun parziala duain vegnir distgargiadas tant las famiglias sco er las interpresas che fan giu quint cun la cassa da cumpensaziun chantunala per famiglias.

Cun l'adattaziun duain ils supplements per uffants e per scolaziun vegnir augmentads per mintgamai 10 francs per mais e per uffant a 240 francs resp. a 290 francs. A medem temp duai vegnir sbassada la tariffa da contribuziun per ils patruns, per las persunas cun gudogn independent e per las persunas impiegadas cun patruns senza obligaziun da pajar contribuziuns, quai dad 1,60 pertschient ad 1,50 pertschient da la summa dals salaris ch'è suttamessa a la AVS. Ina gronda part da las interpresas ch'èn activas en il chantun Grischun po uschia vegnir distgargiada.

Infurmaziuns: Departament d'economia publica e fatgs socials

La Regenza ha concedì a la Scola auta spezialisada dal Grischun (SASGR) ina contribuziun chantunala da maximalmain 114 000 francs per il project da perscrutaziun «IdiomVoice». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Per quest project fan ins quint cun custs da var 396 000 francs.

Il project da perscrutaziun gida a digitalisar la lingua rumantscha. Cun el duai vegnir creà in model da lingua (large language model) che sa basa sin l'intelligenza artifiziala (IA). En in emprim pass duai quai vegnir realisà per il sursilvan. Uschia po la SASGR sa posiziunar sco experta per models da lingua cun ina pitschna basa da datas, acquistar daners da perscrutaziun cun projects successivs e stgaffir a lunga vista plazzas da lavur en il sectur da la perscrutaziun applitgada e da la IA.

Ulteriuras infurmaziuns: https://grdigital.digital/

Infurmaziuns: Departament d'educaziun, cultura e protecziun da l'ambient

La Regenza ha approvà il project cun las «Mesiras immediatas Rempars Pisciadell (UCB)» ch'èn gia vegnidas realisadas en la vischnanca da Poschiavo. L'intent da questas mesiras è stà quel d'augmentar respectivamain da restabilir il nivel da segirezza per las utilisadras ed ils utilisaders da la via chantunala. Per quest project ha ella permess ina contribuziun tenor la cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs Guaud». Als custs budgetads da 2,1 milliuns francs ha ella concedì ina contribuziun chantunala da maximalmain 840 000 francs e disponì ina contribuziun federala da maximalmain 735 000 francs.

L'onn 2023 han plievgias intensivas al sid da l'abitadi da Pisciadell chaschunà crudadas da grippa or dal sectur da l'ur d'ina gronda sedimentaziun. Il material è arrivà sur in chanal fin giu sin la via ed ha interrut quella durant passa 2 emnas. Perquai ch'il traffic era periclità tras quest eveniment e per evitar in'extensiun dal donn, han ins stuì prender immediatamain las mesiras da segirada necessarias. Quellas han cumpiglià la rumida dal chanal sco er la construcziun d'ovras da protecziun provisoricas sco palissadas, raits e protecziuns per retegnair crappa ed in allontanament temporar da l'aua. Silsuenter han ins stabilisà ils lieus da distatga cun raits sco er differentas parts dal grip cun ancras e cun raits da segirezza, avant ch'ins ha pudì installar da la primavaira fin la stad 2024 barrieras permanentas che protegian cunter crudadas da crappa. Per segirar la spunda a lunga vista èn vegnids construids l'onn 2025 rempars da lavinas ed indrizs cunter naiv glischnanta. Plinavant è il chanal da la crudada vegnì emplantà. Il 2026 èsi previs d'adattar l'allontanament da l'aua provisoric ad in sistem permanent.

Infurmaziuns: Departament d'infrastructura, energia e mobilitad

La Regenza ha approvà in project da sanaziun cunter canera per la via d'Engiadina en la vischnanca da S-chanf. Quest project cumpiglia il territori tranter l'entrada nordost dal vitg da S chanf fin a la fracziun da Cinuos-chel entaifer il cunfin communal da S-chanf. Pervia dal surpassament da la limita d'immissiuns en il stadi da giudicament decisiv 2035 sto la via chantunala sin il territori communal da S-chanf vegnir sanada. Il chantun sco proprietari da la via correspundenta è obligà da realisar la sanaziun cunter canera. En il rom dal project da sanaziun cunter canera ha la Regenza concedì la permissiun da reducir la sveltezza maximala sin dus trajects parzials da la via d'Engiadina. A l'entrada sid dal vitg da Cinuos-chel vegn il sectur entaifer il vitg prolungà per circa 80 m ed il tempo reducì dad 80 km/h respectivamain da 60 km/h a 50 km/h. En il sectur dal sviament da Cinuos-chel è signalisada ina sveltezza maximala da 60 km/h. Quella vegn reducida a 50 km/h.

Infurmaziuns: Departament d'infrastructura, energia e mobilitad