Il settember 2025 ha la Regenza nominà Duri Blumenthal sco cumissari da la Regenza per la vischnanca da Sagogn (cf.communicaziun da la Regenza dals 4 da settember 2025). Quest pass è stà necessari, perquai che la suprastanza communala da Sagogn n'era – pervia da differentas demissiuns – betg pli abla da decider.

A chaschun da las elecziuns substitutivas dals 23 d'october 2025 èn vegnids elegids trais novs suprastants, ch'èn entrads en uffizi en il fratemp. Consequentamain è la suprastanza communala da Sagogn puspè cumpletta ed occupada en moda legala e po ademplir sias incumbensas. La Regenza ha prendì enconuschientscha da la terminaziun dal mandat dal cumissari da la Regenza.

Infurmaziuns: Departament da finanzas e vischnancas

La Regenza ha concedì a la Scola auta da pedagogia dal Grischun (SAPGR) ina contribuziun chantunala da maximalmain 240 000 francs per il project da furmaziun supplementara «Rait scola 4.0» per ils onns da studi 2026/2027 fin 2030/2031. Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs imputabels dal project importan 600 000 francs.

Il project «Rait scola 4.0» duai colliar in cun l'auter las acturas ed ils acturs da la transfurmaziun digitala sin differents stgalims da scola. Il project cumpiglia il svilup d'ina rait da cumpetenzas «Digitalisaziun e furmaziun» che ha la finamira da promover la spezialisaziun da persunas d'instrucziun en ils roms MINT (matematica, informatica, scienzas natiralas e tecnica).

En quest connex duai il focus per exempel vegnir mess sin incumbensas sco far tests e controllas da material didactic e da meds d'instrucziun, quai cun integrar novas tecnologias («augmented reality» u «virtual reality») en l'instrucziun, ubain coordinar e sustegnair projects da perscrutaziun, da svilup e da servetschs da la transfurmaziun digitala en la furmaziun (per vischnancas da scola, purtaders da scola, uffizis chantunals, organisaziuns dal mund da lavur e.u.v.).

Ulteriuras infurmaziuns: https://grdigital.digital/

© Scola auta da pedagogia dal Grischun (SAPGR)

Infurmaziuns: Departament d'educaziun, cultura e protecziun da l'ambient

La Regenza ha approvà la dumonda da la Scola auta da pedagogia dal Grischun (SAPGR) da renovar la biblioteca existenta, che cumpiglia la transfurmaziun da tala en ina «open library» en il tract d'engrondiment a la Scalärastrasse a Cuira. Plinavant ha la Regenza garantì a la SAPGR ina contribuziun d'investiziun da maximalmain 465 390 francs en quest connex.

Il project consista da duas parts. En in emprim pass vegnan las medias munidas cun tags RFID (radio frequency identification), quai che permetta d'automatisar ils process da registraziun e da controlla. L'automatisaziun sustegna il self-service, quai vul dir l'utilisaziun da la biblioteca e da las plazzas da lavur durant las uras d'avertura senza persunal. Il persunal vegn distgargià da process da rutina ed ha dapli resursas per la scolaziun e la cussegliaziun. Ils dretgs d'access pon vegnir controllads cun il sistem da badge existent. En in segund pass vegn renovada e flexibilisada l'infrastructura da la biblioteca. Curunas sin rollas duain pussibilitar d'utilisar la biblioteca en moda pli flexibla per sequenzas d'instrucziun e per occurrenzas pli pitschnas. Tut en tut duai la biblioteca daventar pli attractiva per la clientella e per il persunal. Plinavant duai il spazi vegnir utilisà en moda pli efficazia e sco part integrala dal manaschi da scola auta. Las lavurs da renovaziun e da flexibilisaziun da l'infrastructura da la biblioteca duain cumenzar l'onn 2026.

La Regenza ha approvà in project per la correcziun da la via da la Tumleastga, quai sin in traject da circa 400 meters entaifer il vitg da Farschno. Il project è necessari, perquai che la segirezza stradala è manglusa: Per cruschar cun camiuns ston autos da persunas charrar sin il passape.

Il project prevesa da renovar il traject da via confurm a las normas d'ozendi. Cumplementarmain vegn quietà il traffic tar las duas passaschas stretgas avant e suenter il bigl dal vitg, e grazia ad ina nova punt «Scharansertobel Fürstenaubruck» vegn meglierada la segirezza en cas d'aua gronda. Plinavant prevesa il project d'exposiziun in passape nuninterrut ch'è 1,5 meters lad. Adattadas vegnan er las fermadas da bus da tuttas duas varts da la via, per ademplir las pretensiuns da la Lescha davart l'egualitad da persunas cun impediments. Ils custs totals dal project importan circa 3,67 milliuns francs.

En connex cun quest project da via ha l'Uffizi da construcziun bassa er laschà elavurar in project per reducir la canera sin la via da la Tumleastga (via chantunala da colliaziun) – quai da Farschno Nord (autezza dal crest da la furtga) fin al cunfin communal a Fürstenaubruck (Farschno Sid). Vegnida eruida è la grevezza da canera per 35objects. Tenor las retschertgas vegn la limita d‘imissiuns surpassada en 19 cas; tut en tut èn pertutgadas passa 100 persunas. Pervia dal surpassament da la limita d'immissiuns exista in basegn da sanar la via chantunala. Il chantun sco proprietari da la via correspundenta è obligà da realisar la reducziun da la canera. La via da la Tumleastga è ina via betg orientada al traffic. En il rom da quest project da reducziun da la canera ha la Regenza permess da reducir la sveltezza maximala generala sin la via da la Tumleastga da 50 km/h a 30 km/h entaifer la zona dal vitg da Fürstenaubruck, quai sin ina lunghezza da circa 420 meters fin al cunfin communal da Farschno / Scharàns. A l'entrada nord dal vitg vegn plinavant sbassada la sveltezza maximala dad 80 km/h a 50 km/h, per avair in'avantzona davant la zona da tempo 30.

La Regenza ha approvà in project per reducir la canera en la vischnanca da Scharàns. Cumpigliadas èn la via da la Tumleastga e la via da Scharàns (vias chantunalas da colliaziun) sco er la via communala Cresta.

Pervia dal surpassament da la limita d'immissiuns en il stadi da giudicament decisiv 2035, ston las duas vias chantunalas vegnir sanadas. La via da la Tumleastga e la via da Scharàns èn vias betg orientadas al traffic. Il chantun sco proprietari da las vias è obligà da realisar la reducziun da la canera. En il rom dal project per reducir la canera ha la Regenza permess da sbassar la sveltezza maximala generala da 50km/h a 30km/h sin trajects da la via da la Tumleastga e da la via da Scharàns a St.Agatha entaifer il vitg, sco er dad 80km/h a 30km/h sin in traject da la via da Scharàns davent da la storta a dretga Terzlauna a l'entrada da Scharàns.

Infurmaziuns: Departament d'infrastructura, energia e mobilitad

La Regenza grischuna engrazia a la Regenza dal chantun Turitg per il grond sustegn finanzial, che vegn danovamain prestà or dal Fond d'utilitad publica a favur da quatter projects en il chantun Grischun. Las contribuziuns a quests projects d'infrastructura en differentas regiuns ed en divers territoris linguistics èn da gronda impurtanza per la realisaziun dals projects respectivs.

Quests uschenumnads «Projects d'agid naziunal 2025» dal chantun Turitg resguardan ils suandants projects en il chantun Grischun: la sanaziun da l'Alp Ozur en la fracziun Casti (141 000 francs), il mantegniment e la promoziun da la biodiversitad da la cuntrada culturala Avras (148 000 francs), la sanaziun dals mirs sitgs Calanda-Salaz (100 000 francs) sco er la revalitaziun da cuntradas da guaud e da guaud pasculà en Lumnezia (124 000 francs).

Infurmaziuns: Departament d'educaziun, cultura e protecziun da l'ambient