En il chantun Grischun ston las taglias da traffic vegnir adattadas al svilup tecnologic. Las taglias da traffic per autos da persunas duain da nov vegnir calculadas sin basa dal pais e da la prestaziun da norma empè da la cilindrada. Vehichels spezialmain effizients areguard l'energia duain profitar da rabats da durada limitada. Per pudair far las midadas necessarias, propona la Regenza al Cussegl grond da suttametter la Lescha introductiva tar la Lescha federala davart il traffic sin via ad ina revisiun totala.

Las possessuras ed ils possessurs ston pajar ina taglia da traffic per vehichels a motor e per chars annexs ch'èn immatriculads en il chantun Grischun. Il dumber da vehichels cun motors alternativs s'augmenta. Tenor las prognosas actualas vegnan ils vehichels electrics a remplazzar a lunga vista ils vehichels cun motor termic. Sin basa da quest svilup èsi da far quint che las entradas da las taglias da traffic sa reduceschian cuntinuadamain, perquai ch'ils vehichels electrics profiteschan actualmain da reducziuns da la taglia da fin 80 pertschient per ina durada illimitada. Per pudair generar vinavant entradas en la dimensiun actuala, sto la taglia da traffic perquai vegnir concepida da nov.

Finamiras da la nova concepziun
Tenor l'incumbensa dal Cussegl grond duain las taglias da traffic vegnir concepidas uschia, ch'ellas èn ecologicas, ch'ellas èn neutralas areguard las tecnologias e ch'ellas portan in retgav stabil. Partind da questas finamiras èn vegnids examinads numerus models. La Regenza ha considerà ils avantatgs ed ils dischavantatgs dals differents models ed è vegnida a la conclusiun, che las taglias da traffic per autos da persunas duain vegnir calculadas en l'avegnir sin basa dal «pais total» e da la «prestaziun da norma». Las persunas che possedan in vehichel spezialmain effizient areguard l'energia, duain profitar da reducziuns da taglia da durada limitada. Per las ulteriuras categorias da vehichels duain vegnir applitgads vinavant sistems da calculaziun spezials. Las novas taglias da traffic duain valair a partir dal 1. da schaner 2027 per tut ils vehichels.

Reducziuns da taglia pli autas
Questa nova concepziun da las taglias da traffic ha chattà in grond consentiment en la consultaziun. Critica hai dà cunzunt per las reducziuns da taglia proponidas. Perquai ha la Regenza decidì, da reducir las taglias da traffic per vehichels a motor senza emissiun da CO2 fin ils 31 da december 2030 per 50 pertschient e fin ils 31 da december 2034 per 25 pertschient. Vehichels a motor che chaschunan paucas emissiuns e che na retiran lur energia da propulsiun betg d'in motor termic, duain profitar fin ils 31 da december 2030 d'ina reducziun da taglia da 25 pertschient.

Las entradas da las taglias da traffic van – suenter la deducziun da las expensas da l'Uffizi per il traffic sin via – a favur dal quint da las vias.

Agiunta:

Missiva

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 89 71 (cuntanschibel da las 12.30 fin las 14.00), e‑mail medienstelle@djsg.gr.ch

Responsabladad: Regenza