Il ePortal da l'administraziun chantunala dal Grischun è en funcziun dapi il november 2024. La bilantscha è legraivla: Per emna visitan var 1500 utilisadras ed utilisaders la plattafurma online. La purschida da servetschs digitals vegn extendida cuntinuadamain.
Per emna visitan var 1500 utilisadras ed utilisaders il ePortal (eportal.gr.ch) da l'administraziun chantunala dal Grischun. La plattafurma online porscha in access simpel e segir a servetschs administrativs digitals. Dapi il cumenzament il november 2024 èn gia stgars 3000 persunas sa registradas per il eConto gratuit. «Nus ans legrain fitg dal grond interess da la publicitad», di Marc Heuberger, manader dal Post da stab Administraziun digitala. L'interess mussia, che la populaziun e las interpresas dovran pli e pli savens servetschs administrativs independentamain dal lieu e da las uras d'avertura. En il fratemp dumbra il ePortal passa 40 servetschs administrativs digitalisads, ulteriurs vegnan vitiers pass per pass. Il pli savens vegnan duvradas la dumonda da prolungar il termin per inoltrar la decleraziun da taglia, la dumonda per ina permissiun per persunas estras sco er l'empustaziun da numers d'immatriculaziun da reserva.
Las visitadras ed ils visitaders dal ePortal survegnan sustegn
Sche las utilisadras ed ils utilisaders dovran per exempel agid per sa registrar u per s'annunziar, pon ellas ed els contactar da tuttas uras, durant 7 dis l'emna, il support. Plinavant als stat a disposiziun in catalog detaglià da dumondas e respostas ed en curts videos vegnan decleradas en moda simpla las differentas funcziunalitads dal ePortal sco er la registraziun per il eConto.
Nova funcziunalitad en il eConto
Actualmain po la gronda part dals servetschs vegnir utilisada senza eConto u cun in eConto sin il stgalim da confidenza il pli bass da tut en tut trais stgalims (guardar part «Uschia avris Vus in eConto»). La purschida da servetschs sin il ePortal vegn extendida cuntinuadamain. En il futur vegnan a vegnir vitiers er servetschs, per ils quals ins vegn a duvrar in stgalim da confidenza pli aut. A partir d'immediat pon utilisadras ed utilisaders obtegnair en lur eConto tuts trais stgalims da confidenza.
Proxims pass da cumplettaziun: Facilitar il barat tranter la publicitad e l'administraziun
Cun la Strategia Administraziun digitala Grischun 2024–2028 vegnan cumplettadas las prestaziuns administrativas digitalas en etappas. Uschia pon vegnir rimnadas experientschas impurtantas e las ristgas dal project pon vegnir minimadas. La finamira è quella da facilitar il barat digital tranter la publicitad e l'administraziun.
Tar ils proxims pass da cumplettaziun tutga la chascha da brevs digitala. Tgi che posseda in eConto, vegn a pudair retschaiver tscherts documents da l'administraziun chantunala sur il ePortal. L'utilisaziun da servetschs administrativs digitals vegn concepida en moda che resguarda spezialmain la clientella. Tut las prestaziuns digitalas duain pudair vegnir utilisadas en l'avegnir cun mo in unic login. Pass per pass vegnan perquai colliads ulteriurs servetschs al sistem. La liquidaziun da las fatschentas cun l'administraziun chantunala dal Grischun sur l'internet na vegn en l'avegnir betg mo ad esser pussaivla per persunas natiralas, mabain er per persunas giuridicas. Ultra da quai vegnan las burgaisas ed ils burgais a pudair sa laschar represchentar tras in'autra persuna per la liquidaziun da fatschentas en il spazi digital.
Links impurtants:
Infurmaziuns:
Marc Heuberger, manader dal Post da stab Administraziun digitala, tel. +41 81 257 32 02 (cuntanschibel da las 10.00 fin las 12.00), e‑mail Marc.Heuberger@dfg.gr.ch
Responsabladad: Departament da finanzas e vischnancas, Post da stab Administraziun digitala
Segir e gratuit: Uschia creais Vus in eConto
Il eConto è il conto d'utilisaziun per servetschs digitals da l'administraziun publica. La registraziun vegn fatga ina giada ed è gratuita. Sche Vus essas As registrada u registrà ina giada, vegnan Vossas datas persunalas surpigliadas automaticamain, cura che Vus faschais diever d'in servetsch. Actualmain po la gronda part dals servetschs vegnir utilisada senza eConto u cun in eConto sin il stgalim da confidenza il pli bass da tut en tut trais stgalims. La purschida da servetschs sin il ePortal vegn extendida cuntinuadamain. En il futur vegnan a vegnir vitiers er servetschs, per ils quals ins vegn a duvrar in stgalim da confidenza pli aut.
A partir d'immediat pudais Vus obtegnair en Voss eConto tuts trais stgalims da confidenza. L'emprim pass è la registraziun. Uschia survegnis Vus automaticamain il stgalim da confidenza il pli bass. Per quel dovri intginas indicaziuns davart Vossa persuna: Il num ed il prenum uffizial (sco inditgà en il passaport u en la carta d'identitad), l'adressa dad e-mail, la data da naschientscha, il numer da telefonin, in num d'utilisaziun che po vegnì tschernì libramain ed in pled-clav. Il stgalim da confidenza mesaun pretenda ina identificaziun per video. Per quella duvrais Vus in document d'identitad valaivel (p.ex. la carta d'identitad u il passaport) e Voss telefonin, per pudair far ina registraziun da video da Vossa fatscha. Per cuntanscher il stgalim da confidenza il pli aut, dovri l'indicaziun da Voss numer AVS. Quel vegn cumpareglià cun il Register naziunal da la AVS.
Nova pussaivladad d'annunzia cun l'app AGOV
Las utilisadras ed ils utilisaders dal ePortal pon s'annunziar da nov en lur eConto er cun l'app AGOV. Il login administrativ svizzer AGOV (www.agov.ch) è in servetsch d'autentificaziun che vegn mess a disposiziun da la Confederaziun. Cuntrari ad autras pussaivladads da login na dovra il AGOV-login nagin num d'utilisaziun e nagin pled-clav. Tar AGOV vegn l'autentificaziun fatga sur l'app «AGOV access» sin il smartphone. Questa pussaivladad d'annunzia correspunda ad auts standards da segirezza.
Ultra dal AGOV-login pon las utilisadras ed ils utilisaders dal ePortal er s'annunziar vinavant directamain en il eConto u duvrar la SwissID. Pli tard vegn a star a disposiziun la e-ID da la Confederaziun. Il chantun Grischun vegn a pussibilitar d'utilisar la e-ID. L'utilisaziun da la e-ID è facultativa per la populaziun.