Il Grischun sa participescha a l'evacuaziun d'uffants da Gaza per motivs medicinals. En cunvegnientscha cun la Confederaziun e cun las organisaziuns d'agid al lieu accoglia il chantun Grischun in uffant per al tractar en l'ospital. L'uffant vegn accumpagnà da trais confamigliars.

Il venderdi èn las persunas respectivas arrivadas en Svizra, quai en il rom da l'evacuaziun umanitara internaziunala. Il chantun Grischun ha examinà conscienziusamain la dumonda da la Confederaziun d'accoglier uffants da Gaza en Svizra per als tractar en in ospital. Ils vasts scleriments han mussà, ch'il Grischun ha la savida spezialisada e las infrastructuras necessarias per pudair prestar ina contribuziun en il rom da questa evacuaziun medicinala. Ils ulteriurs scleriments vegnan fatgs en l'Ospital chantunal dal Grischun a Cuira, in eventual ulteriur tractament, sche necessari, er en l'Ospital d'uffants a Son Gagl. Avant l'arrivada en Svizra han las autoritads da segirezza federalas fatg ina controlla da segirezza.

Proteger la sfera privata da las persunas grevamain pertutgadas
Las datas da sanadad da las pazientas e dals pazients da Gaza èn suttamessas – sco tut las datas da pazients – a l'obligaziun da discreziun dals medis e vegnan tractadas en moda confidenziala. Las autoritads supplitgeschan perquai d'avair chapientscha, ch'i na pon vegnir fatgas naginas ulteriuras indicaziuns davart las persunas respectivas.

Cuntinuar cun la tradiziun umanitara da la Svizra
En il senn da la tradiziun umanitara vul il chantun Grischun prestar – cun quest act da solidaritad – ina pitschna contribuziun a favur d'in uffant e d'ina famiglia giuvna, savend che la gronda miseria en bleras regiuns dal mund na svanescha betg simplamain uschia.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel sonda, ils 29 da november 2025 da las 12.00 fin las 13.00), e‑mail medienstelle@djsg.gr.ch

Responsabladad: Departament da giustia, segirezza e sanadad