L'extensiun da la purschida dad e-voting en il chantun Grischun cuntinuescha. A partir d'immediat pon er las votantas ed ils votants da Cazas, La Punt Chamues-ch, Schluein e Scuol sa registrar per la votaziun electronica. Persunas interessadas da las 26 vischnancas dad e-voting, che s'annunzian fin il pli tard ils 11 da schaner 2026, pon votar gia a chaschun da la votaziun dal pievel dals 8 da mars 2026 sin via electronica.
Dapi ch'ins ha cumenzà cun il manaschi d'emprova dad e-voting, è la purschida vegnida extendida pass per pass. Ed er a chaschun da la proxima votaziun dals 8 da mars 2026 crescha il circul da las vischnancas participantas danovamain. Ensemen cun Cazas, La Punt Chamues-ch, Schluein e Scuol cumpiglia la purschida dad e-voting da nov gia 26 vischnancas – passa in quart da tut las vischnancas grischunas. Guardà sin il dumber da persunas cun dretg da votar che pon sa registrar oz per il chanal da votaziun electronic, stat e-voting gia a disposiziun a passa la mesadad dal chantun Grischun.
L'annunzia è pussaivla da tut temp
Fin oz èn circa 7000 persunas s'annunziadas en ina da questas vischnancas per la votaziun electronica. Quai èn stgars 10 pertschient da las persunas cun dretg da votar en las 26 vischnancas, ed il dumber crescha cuntinuadamain. L'annunzia è pussaivla sur la pagina d'internet dal chantun u da la vischnanca respectiva. Independentamain da la data da la votaziun dal pievel pon votantas e votants interessads en questas 26 vischnancas s'annunziar da tut temp per il e-voting. Per che la registraziun possia dentant vegnir resguardada per la proxima votaziun, sto ella vegnir inoltrada il pli tard 8 emnas avant il di da votaziun. Per la votaziun dal pievel dals 8 da mars 2026 scada il termin d'annunzia ils 11 da schaner 2026.
Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch/rm.
Qua vai tar l'annunzia per e-voting en il chantun Grischun: www.gr.ch/e-voting/anmelden
Charta:
blau stgir, dapi il 2024 / blau, dapi il 2025 / cotschen, a partir dal mars 2026
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.00 fin las 12.00), e‑mail Daniel.Spadin@staka.gr.ch
Responsabladad: Chanzlia chantunala