La Regenza ha concludì da metter en vigur la nova Lescha chantunala davart la promoziun d'abitaziuns per il 1. da schaner 2026. Purtaders d'abitaziuns d'utilitad publica pon da nov vegnir promovids cun emprests a tschains favuraivels, sch'els construeschan, renoveschan u cumpran abitaziuns da locaziun favuraivlas. Dumondas pon vegnir inoltradas a partir d'immediat.
Cun la nova Lescha davart la promoziun d'abitaziuns (LPA) metta il chantun a disposiziun in nov instrument per sustegnair purtaders d'abitaziuns d'utilitad publica che construeschan u saneschan abitaziuns da locaziun favuraivlas. Plinavant vegn extendì l'instrument da promoziun existent per la meglieraziun da las relaziuns d'abitar en il territori da muntogna.
Emprests a tschains favuraivels per purtaders d'abitaziuns d'utilitad publica
Per construir, sanar u cumprar abitaziuns da locaziun favuraivlas pon da nov vegnir concedids emprests a tschains moderads a purtaders d'abitaziuns d'utilitad publica. Quests emprests vegnan concedids cumplementarmain als emprests a tschains favuraivels or dal fond da rotaziun da la Confederaziun. L'autezza e las cundiziuns dals emprests chantunals correspundan als emprests federals. Purtaders d'abitaziuns d'utilitad publica pon inoltrar a partir d'immediat dumondas da promoziun.
Per promover la construcziun d'abitaziuns d'utilitad publica stat per entant a disposiziun in credit d'impegn general da 15 milliuns francs. Analogamain a la Confederaziun vegn quest credit d'impegn general administrà sco fond da rotaziun chantunal.
Meglieraziun da las relaziuns d'abitar en il territori da muntogna
L'instrument da promoziun existent per la «meglieraziun da las relaziuns d'abitar en il territori da muntogna» vegn amplifitgà. Dapli persunas e famiglias duain pudair dumandar meds da promoziun per acquistar, construir u renovar u in'abitaziun u ina chasa da proprietad. Per quest intent vegnan per l'ina auzadas las limitas d'entrada e da facultad e per l'autra augmentads ils meds da promoziun. Il formular da dumonda è vinavant disponibel.
Per l'onn 2026 stattan da nov a disposiziun totalmain 2 milliuns francs (2025: 1 milliun francs).
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 14.30 fin las 15.00), e‑mail Marcus.Caduff@dvs.gr.ch
Responsabladad: Regenza