Il 1. da schaner 2026 entra en vigur la revisiun parziala da la Lescha da polizia dal chantun Grischun. Il chantun ha stgaffì uschia ina basa giuridica moderna, per identifitgar a temp violenza, per valitar ristgas e per proteger meglier la populaziun.
La Polizia chantunala installescha in post spezialisà interdisciplinar per in Management chantunal da smanatschas (MCS). In team da persunas spezialisadas da la polizia, da la psicologia forensica e da la lavur sociala collavura stretgamain cun expertas ed experts medicinals, cun autoritads e cun organisaziuns privatas per identifitgar e mitigiar signals che averteschan a grevs acts da violenza. In psichiater forensic stat a disposiziun al post spezialisà per supervisiuns da cas e per l'ulteriur svilup strategic. Il post spezialisà po giuditgar la periclitaziun en moda scientificamain fundada sco er instradar sez mesiras ubain cussegliar las autoritads cumpetentas en chaussa.
Il nov gremi spezialisà MCS analisescha situaziuns difficilas, sviluppa strategias da prevenziun e promova il barat tranter tut las persunas participadas. Sch'il potenzial da violenza è spezialmain grond, vegnan organisadas conferenzas da cas per planisar e per realisar mesiras en moda coordinada. Uschia vegni garantì, che tut las acturas ed ils acturs relevants sesian enturn ina maisa e che las ristgas vegnian valitadas en moda cumplessiva.
Identificaziun a temp e prevenziun
Ils signals d'avertiment per grevs acts da violenza pon esser differents. Per exempel pon vegnir exprimidas intenziuns da commetter in act da violenza, smanatschas directas u stalking ubain sviluppads plans concrets d'acts u da fantasias da violenza. Er ina fascinaziun exprimida per anteriuras delinquentas e delinquents u il sentiment «da na pudair perder pli nagut», pon esser indizis per in eventual privel.
En cas da suspect vegn la populaziun supplitgada da contactar l'emprim il post da polizia local. En situaziuns da privel acut èsi adina da contactar il clom d'urgenza. Il post spezialisà examinescha cun quità tut las annunzias che entran, ed instradescha en cas da basegn ils ulteriurs pass.
Suenter in'annunzia sclerescha il Post spezialisà MCS l'emprim, en il rom d'ina examinaziun preliminara, quant enavant che l'incident descrit correspunda als criteris prescrits tras lescha per avrir in cas MCS. Sch'ils criteris èn ademplids, rimna il Post spezialisà MCS tut las infurmaziuns ch'el dovra per valitar las ristgas en moda scientificamain fundada. Tut tenor cas èsi sin basa da las valitaziuns pussaivel da prender mesiras, sco discurs preventivs, perquisiziuns da la chasa, mesiras d'arrest u da persecuziun penala, la consultaziun da persunas spezialisadas medicinalas u la retratga d'armas. Plinavant èn er pussaivels tractaments psichiatrics u psicologics, intervenziuns da la lavur sociala, mesiras da la protecziun da victimas u in monitoring.
Novas structuras per dapli segirezza
Ina segirezza absoluta ch'il MCS possia impedir acts da violenza, na datti betg. El po dentant identifitgar ordavant pussaivels acts da violenza ed uschia augmentar la schanza, ch'i daventia pli difficil da propi far tals acts. Spezialmain efficazi è il sistem, sch'ils acts da violenza èn intenziunads e sch'i dat ordavant signals d'avertiment, sco per exempel tar attentats, violenza a chasa u violenza cunter autoritads.
Las adattaziuns en l'Ordinaziun da polizia (OPol; DG 613.100) concretiseschan las novas incumbensas e cumpetenzas. Plinavant vegn la Polizia chantunala designada en l'ordinaziun sco post cumpetent per l'annunzia da mesiras en cas da violenza a chasa tenor il Cudesch da procedura penala svizzer. Tras in agen sistem per elavurar datas po il post spezialisà documentar ils cas en moda segira ed a lunga vista.
L'efficacitad dal Management chantunal da smanatschas sa basa sin trais facturs centrals: l'annunzia d'infurmaziuns relevantas tras partenaris colliads e la populaziun, las cleras cundiziuns generalas giuridicas ed areguard la protecziun da datas sco er las resursas disponiblas en ils secturs tematics respectivs. Mo tras l'interacziun da quests elements po il MCS sviluppar cumplainamain ses effect preventiv e rinforzar la segirezza da la populaziun.
Cun il MCS prenda il Grischun en mira in concept preventiv: Tras l'identificaziun tempriva da ristgas e tras la collavuraziun interdisciplinara vegnan grevs acts da violenza difficultads u en il meglier cas impedids. Il Post spezialisà MCS lavura senza la cumpetenza da dar directivas, ma cun metodas scientificamain fundadas – per proteger tuttas e tuts.
Infurmaziuns:
Markus Meyer, manader MCS, tel +41 81 257 73 62 (cuntanschibel da las 14.00 fin las 16.00), e‑mail Markus.Meyer@kapo.gr.ch
Responsabladad: Regenza