La purschida dad e-voting s'extenda vinavant en il chantun Grischun. Gia en 26 vischnancas pon las votantas ed ils votants s'annunziar per il chanal da votaziun electronic. Cun San Vittore e Sumvitg vegnan ussa vitiers ulteriuras vischnancas. Tgi che s'annunzia fin il pli tard ils 11 da schaner 2026, po dar giu sia vusch sin via electronica gia a la votaziun dal pievel dals 8 da mars 2026.

Il chanal da votaziun electronic vegn utilisà frequentamain en il chantun Grischun. A chaschun da l'ultima votaziun dal pievel, ils 30 da november 2025, èn totalmain 13,4 pertschient da tut las vuschs entradas sin via electronica. La pli gronda cumpart da vuschs dad e-voting èn vegnidas registradas en las vischnancas d'Arosa (26,1 %), Lumnezia (27,6 %), Puntraschigna (27,9 %) e Silvaplauna (26,9 %). Mo en la citad da Cuira ed en la vischnanca da Tusaun, che han introducì il e-voting per l'ultima votaziun dal pievel, era questa cumpart anc sut 10 pertschient. Il grond interess per il chanal da votaziun electronic sa mussa er tar las vischnancas – mo gia quest onn è il circul dad e-voting dal chantun Grischun creschì per 16 ulteriuras vischnancas. Sch'ins quinta vitiers las novas vischnancas, èsi pussaivel a partir dal mars da votar sin via electronica en totalmain 28 vischnancas.

Emprim termin d'annunzia fin ils 11 da schaner 2026
Tut las votantas e tut ils votants interessads da las vischnancas dad e-voting pon s'annunziar da tut temp per il chanal da votaziun electronic. A partir d'immediat cumpiglia quai er las votantas ed ils votants da las vischnancas da San Vittore e Sumvitg. Per che la registraziun possia vegnir resguardada per la proxima votaziun, sto l'annunzia dentant vegnir inoltrada il pli tard 8 emnas avant il di da votaziun. Per la votaziun dal pievel dals 8 da mars 2026 scada il termin d'annunzia pia gia ils 11 da schaner 2026. L'annunzia è pussaivla sur la pagina d'internet dal chantun u da la vischnanca respectiva.

Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch/rm.

Qua vai tar l'annunzia per e-voting en il chantun Grischun: www.gr.ch/e-voting/anmelden

Charta:

Infurmaziuns:

Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 09.00 fin las 10.30), e‑mail Daniel.Spadin@staka.gr.ch

Responsabladad: Chanzlia chantunala