Cun la publicaziun dal Program annual 2026 preschenta la Regenza las pli impurtantas finamiras da l'onn current. Cun la realisaziun da las finamiras duai er vinavant vegnir meglierada cuntinuadamain l'attractivitad dal chantun Grischun. Ils puncts centrals dal program annual da quest onn è la realisaziun pass per pass da la Strategia chantunala da persunal sco er l'elavuraziun e l'entrada en vigur da differents projects da lescha.
Il program da la Regenza ed il plan da finanzas èn – tenor la Constituziun chantunala – ils instruments centrals da la gestiun strategica e politica dal chantun Grischun. Ensemen furman els la planisaziun a media vista dals puncts centrals da la Regenza. Il Program da la Regenza 2025–2028 metta en il focus ils puncts centrals «transfurmaziun digitala», «viver e lavurar», «clima ed ambient» sco er «Grischun attractiv». Ils puncts centrals da svilup dal program da la Regenza vegnan mintgamai concretisads e realisads en ils programs annuals. Il Program annual 2026, ch'è il segund program annual da la perioda da planisaziun dal nov program da la Regenza, cumpiglia tut en tut 84 finamiras annualas. El è vegnì tractà dal Cussegl grond en la sessiun da december 2025 en il rom da la missiva dal preventiv. Ils pli impurtants puncts centrals da la planisaziun annuala 2026 èn:
Meglierar l'attractivitad dal patrun ed augmentar la promoziun chantunala da la construcziun d'abitaziuns
L'onn 2026 duai la realisaziun da la Strategia chantunala da persunal 2024–2028 cuntinuar pass per pass. Ils puncts centrals da l'onn current èn l'implementaziun da la nova strategia da recrutaziun, la francaziun da valurs cuminaivlas e d'in model directiv cuminaivel, l'elavuraziun d'instruments per rinforzar la marca da patrun da lavur sco er l'organisaziun e l'extensiun dal svilup dal persunal e da la direcziun. Cun realisar la Strategia chantunala da persunal ha la Regenza l'intenziun da meglierar sistematicamain e duraivlamain l'attractivitad dal patrun. Cun l'entrada en vigur da la Lescha davart la promoziun d'abitaziuns (LPA) duain plinavant vegnir promovids cuntinuadamain dapli projects d'abitaziuns. La lescha gida considerablamain a cuvrir duraivlamain il basegn d'abitaziuns pajablas ed a sustegnair sistematicamain la realisaziun da projects per construir abitaziuns.
Rinforzar la furmaziun professiunala ed il traffic betg motorisà en il chantun
Sin fundament da la fasa d'analisa ed ensemen cun differentas gruppas d'interess vegnan deducidas recumandaziuns per las structuras da las purschidas transitoricas e da las scolas professiunalas spezialisadas, per novs models da l'instrucziun en las scolas professiunalas spezialisadas sco er per models e pussaivladads da finanziaziun en il sectur dals manaschis d'emprendissadi, dals curs intermanaschials sco er da las ulteriuras mesiras. Sin basa da questas recumandaziuns vegn elavurada l'onn 2027 la strategia per rinforzar la furmaziun professiunala da basa. Plinavant vegn la furmaziun professiunala rinforzada tras ina nova Lescha davart la furmaziun professiunala superiura (LFPS). La lescha stgaffescha las cundiziuns generalas, per che las instituziuns da la furmaziun professiunala superiura possian concepir vinavant purschidas da furmaziun flexiblas ed orientadas al futur. Il Cussegl grond vegn previsiblamain a tractar il project durant la sessiun d'avrigl 2026. Ultra da quai vegn il traffic betg motorisà rinforzà sistematicamain en il chantun, quai cun cumenzar a realisar pass per pass la «Strategia per il traffic betg motorisà en il Grischun 2037», ch'è vegnida deliberada l'onn passà.
Provediment da sanadad decentral e confurm als basegns en il chantun Grischun
Il «Model directiv concernent l'organisaziun dal provediment da la sanadad en il chantun Grischun» che vegn revedì ed actualisà, duai mussar soluziuns pussaivlas per segirar il provediment da sanadad decentral en il chantun Grischun. El duai er servir sco basa per la planisaziun dals ospitals 2026. Ultra da quai duai el sclerir eventualas adattaziuns legalas necessarias, sco per exempel la flexibilisaziun da la furma d'organisaziun dals furniturs da prestaziuns, ubain ulteriurs models da finanziaziun. Il model directiv revedì ed actualisà duai esser disponibel il cumenzament da la stad 2026. Cumbinada cun quai è er la revisiun parziala da la Lescha davart ils Servetschs psichiatrics dal Grischun (SPGR). Las experientschas, ch'ils SPGR han fatg fin ussa en la Val dal Rain da Cuira cun la purschida da l'intervenziun ambulanta en cas da crisa, han mussà, ch'igl è pussaivel d'impedir var 50 pertschient da las entradas staziunaras. Plinavant gida questa purschida a destigmatisar malsognas psichicas ed a meglierar il provediment psichiatric en il chantun. Grazia a questa purschida pon las persunas pertutgadas participar pli ditg a la vita sociala. Cun la revisiun parziala da la Lescha davart ils Servetschs psichiatrics dal Grischun vul la Regenza extender l'intervenziun ambulanta en cas da crisa confurm als basegns.
Rinforzar instruments cunter violenza a chasa
Cun deliberar la Lescha cunter violenza a chasa duai la finala vegnir stgaffì in instrument efficazi cunter la violenza en las atgnas quatter paraids. En il Cussegl grond è la debatta davart il project previsa per la segunda mesadad da l'onn 2026.
Agiuntas:
Infurmaziuns:
President da la Regenza Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 13.30 fin las 14.00), e‑mail Martin.Buehler@dfg.gr.ch
Responsabladad: Regenza