La Regenza auza per il 1. da favrer 2026 ils imports da facultad libers en l'agid social. Plinavant ha ella approvà il program chantunal per promover e per mantegnair la tratga da remagliaders pitschens.
La Regenza auza ils imports da facultad libers en l'agid social
La Regenza ha approvà la revisiun parziala da las Disposiziuns executivas tar la Lescha chantunala da sustegn (DEtLS). Qua tras adatta ella ils imports da facultad libers en l'agid social a las directivas revedidas da la Conferenza svizra da l'agid social (COSAS). La revisiun da l'ordinaziun entra en vigur il 1. da favrer 2026.
Ils imports da facultad libers vertents dateschan da l'onn 1989 e n'èn betg vegnids midads durant quests passa 35 onns. Perquai ch'ils custs da viver èn s'augmentads fermamain dapi lura, è resultà in basegn d'adattaziun urgent. L'index naziunal dals pretschs da consum è s'augmentà per bunamain 50 pertschient dapi la fin dals onns 1980. Correspundentamain vegnan ils imports da facultad libers augmentads per 50 pertschient.
Ils imports da facultad libers na vegnan betg resguardads per calcular la basegnusadad e per fixar il sustegn. Els portan ina tscherta libertad d'agir en cas d'expensas imprevisas durant la retratga d'agid social. En ina dimensiun limitada permettan els plinavant in provediment en atgna responsabladad. Ed els dattan impuls per meglierar activamain l'atgna situaziun. Ultra da quai èn cunzunt chasadas cun paucs meds finanzials pertutgadas spezialmain fitg da la chareschia. L'adattaziun dals imports libers al svilup da la chareschia rinforza pia la segirezza sociala e permetta d‘actualisar l'agid social en il chantun Grischun confurm al temp.
Infurmaziuns: Departament d'economia publica e fatgs socials
La Regenza ha approvà la revisiun parziala da las Disposiziuns executivas tar la Lescha chantunala da sustegn (DEtLS).
Promoziun dals remagliaders pitschens
La Regenza ha approvà il program chantunal per promover e per mantegnair la tratga da chauras e da nursas, la producziun da latg-chaura e da latg-nursa sco er las razzas indigenas per ils onns 2026 fin 2028. Per il program da 3 onns ha ella deliberà ina summa da promoziun maximala da 3,15 milliuns francs. Ils daners vegnan pajads cun la resalva, ch'il Cussegl grond approveschia il credits necessaris.
Cun il sustegn finanzial da la tratga da nursas e da chauras vegn persequitada la finamira da meglierar las cundiziuns da producziun per la tegnida da remagliaders pitschens en general ed en spezial en il sectur da la producziun da latg en il chantun Grischun e da rinforzar persistentamain la situaziun economica dals manaschis respectivs. A medem temp duai vegnir utilisà meglier il potenzial da vendita dals products da latg che resultan qua tras. La promoziun duai gidar a segirar la gestiun dals manaschis d'alpegiada sco er ad augmentar la valurisaziun dals manaschis ed a stabilisar la basa d'entradas dals manaschis pertutgads cun indemnisar en moda adequata ils gronds custs da lavur che resultan en connex cun la tegnida da remagliaders pitschens – en spezial en la producziun da latg sin manaschis d'alpegiada e sin manaschis da l'entir onn. Ultra da quai gida la promoziun a segirar la cultivaziun da las surfatschas d'alpegiada, a mantegnair las surfatschas utilisadas da l'agricultura en las zonas da muntogna sco er a tegnair liber la cuntrada cultivada en il territori d'alp e da muntogna.
Infurmaziuns: Departament d'economia publica e fatgs socials
La Regenza ha approvà il program chantunal per promover e per mantegnair la tratga da chauras e da nursas, la producziun da latg-chaura e da latg-nursa sco er las razzas indigenas per ils onns 2026 fin 2028.
