La Regenza ha renconuschì la renovaziun da la staziun da Casti sco mesira subvenziunabla per promover il traffic public. Sut la resalva ch'il Cussegl grond concludia definitivamain l'expensa ed approveschia il credit, ha ella empermess a la vischnanca d'Alvra ina contribuziun chantunala da maximalmain 1,87 milliuns francs tenor la Lescha davart il traffic public (LTrP). Ils custs totals dal project che pertutgan la vischnanca d'Alvra, importan circa 8,29 milliuns francs.

La staziun da Casti è in nuf da traffic regiunal impurtant en la Val d'Alvra. Ella è il punct da colliaziun per las lingias regiunalas e localas da l'auto da posta e vala sco «porta d'entrada» turistica al Parc Ela. Per la Viafier retica ha la staziun ina impurtanza speziala sco lieu impurtant per entrar e sortir dal Bernina Express. Plinavant sa chatta la staziun en la zona centrala da la Viafier retica sco Patrimoni mundial da la UNESCO e giauda perquai in'attracziun surregiunala. Tras la renovaziun da la staziun resulta in center da traffic multimodal impurtant, che collia optimalmain il traffic betg motorisà cun la Viafier retica sco er cun il traffic da l'auto da posta en l'entira regiun. Il project consista da nov projects parzials: terminal d'autos da posta, plazza da volver per autos da posta incl. auzament dal mir da sustegn, parcadi per autocars e stabiliment da park+ride per bus, stabiliment da park+ride per autos da persunas (da la vart da la muntogna), access al terminal d'autos da posta e sbuccada en la via naziunala, access al parcadi, access e concepziun da la plazza da la staziun, sutpassadi per persunas ed access e parcadi sin la plazza da la staziun sco er tar l'edifizi da la posta. Vegnids renconuschids sco subvenziunabels èn ils emprims tschintg projects parzials.

Il chantun Grischun e las vischnancas concessiunaras da las Ovras electricas Zervreila (OEZ) han fundà cuminaivlamain in'organisaziun da project. Las vischnancas concessiunaras, ch'eran gia s'associadas en ina corporaziun, èn Flem, Ilanz/Glion, Lumnezia, Panaduz, Sagogn, Schluein, Trin, Tumein, Val S. Pieder e Val Stussavgia. Il nov gremi sa numna «Societad da project Zervreila SA» ed è organisà en furma d'ina societad anonima. Ses intent è quel da renovar la concessiun respectivamain da concessiunar da nov las Ovras electricas Zervreila. Vegnida fundada è la «Societad da project Zervreila SA» cun in chapital d'aczias da 100 000 francs. La cooperaziun da las vischnancas concessiunaras da las OEZ ed il chantun sa participeschan mintgamai mez e mez a la societad.

La radunanza constitutiva da l'organisaziun da project «Societad da project Zervreila SA» ha gì lieu mesemna, ils 28 da schaner 2026, a Val S. Pieder. Il cussegl d'administraziun ha trais commembers. Las vischnancas concessiunaras da las OEZ vegnan represchentadas tras Stefan Schmid, president da la corporaziun da las vischnancas concessiunaras da las OEZ – il chantun tras Thomas Schmid, manader da l'Uffizi d'energia e da traffic. Sco terz commember vegn lic. iur. Conradin Luzi a far part dal cussegl d'administraziun.

La concessiun da las actualas Ovras electricas Zervreila SA scada l'onn 2037. L'organisaziun da project duai far tut las lavurs preliminaras necessarias en connex cun ils implants electrics da las Ovras electricas Zervreila, per pudair dar ina nova concessiun per utilisar la forza idraulica.