Dals 16 fin ils 25 da favrer 2026 ha lieu la sisavla ediziun da la «Emna Rumantscha». Durant quels dis vegn la lingua rumantscha en il vair senn dal pled en moviment. Cun visitas en scola e lecziuns da rumantsch en ils chantuns Vad e Genevra sco er cun communicaziuns da bainvegni rumantschas en tscherts trens dad Intercity tranter Genevra e Cuira sco er tranter Turitg e Cuira arriva la quarta lingua naziunala en il mintgadi da la Svizra franzosa e sin las axas da traffic centralas da la Svizra.

L'Emna internaziunala da la lingua rumantscha (Emna rumantscha) è vegnida lantschada sin iniziativa dal cusseglier federal Ignazio Cassis. Dapi l'onn 2021 vegn ella organisada dal Departament federal d'affars exteriurs (DFAE) en collavuraziun cun il chantun Grischun e cun la Lia Rumantscha. La finamira è da suttastritgar l'impurtanza da la plurilinguitad per la coesiun naziunala e per la politica exteriura da la Svizra cun metter l'accent sin la pli pitschna e pli veglia lingua naziunala svizra. Quest onn stat la «Emna Rumantscha» cumplainamain sut l'ensaina da crear contacts linguistics tranter la Svizra franzosa ed il chantun Grischun.

Lecziuns da rumantsch sin il stgalim superiur a Genevra e Vevey
La «Emna Rumantscha» porta la lingua rumantscha là, nua che persunas giuvnas emprendan, s'inscuntran e concepeschan lur avegnir, numnadamain en scola. Il program da quest onn cumpiglia sequenzas d'instrucziun respectivamain in curs intensiv da rumantsch en trais lecziuns. Sco lieus per l'inscunter linguistic èn vegnids tschernids il Collège de Candolle a Genevra (16-02-2026) e l'emprima classa secundara a Corsier-sur-Vevey en il chantun Vad (25-02-2026). A maun da gieus e da lavurs interactivas scuvran las scolaras ed ils scolars il rumantsch, emprendan d'enconuscher las colliaziuns dal rumantsch cun il franzos ed emprendan simplas locuziuns per il mintgadi. Ina quarta lecziun vegn concepida dal musicist rumantsch Mario Pacchioli, che intermediescha la lingua en moda musicala e creativa. Ils chantuns Grischun, Vad e Genevra vegnan represchentads tras:

• Jon Domenic Parolini, cusseglier guvernativ e schef dal Departament d'educaziun, cultura e protecziun da l'ambient dal chantun Grischun
• Anne Hiltpold, cussegliera guvernativa e scheffa dal Departament da furmaziun dal chantun Genevra
• Cédric Blanc, directur general da l'Uffizi per la scola populara e la pedagogia speziala dal chantun Vad

«Bun di» en trens dad Intercity da las Viafiers federalas
Cumplementarmain a las visitas en scola vegn il rumantsch er ad esser preschent en il spazi public: Durant la «Emna Rumantscha» pon ins udir communicaziuns da bainvegni rumantschas en tscherts trens dad Intercity sin las lingias da Genevra–Cuira e da Turitg–Cuira. La collavuraziun cun las Viafiers federalas svizras permetta uschia, che la quarta lingua naziunala vegn udida da millis viagiaturas e viagiaturs e percepida sco part normala da la plurilinguitad svizra.

A partir dals 16 da favrer 2026 preschenta il DFAE cuntinuadamain ulteriuras activitads en il rom da la «Emna Rumantscha».

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 11.00 fin las 11.30), e‑mail Jondomenic.Parolini@ekud.gr.ch
• Alberto Palaia, delegà dal Post spezialisà per la plurilinguitad, tel. +41 81 257 44 65 (cuntanschibel da las 13.00 fin las 17.00), e‑mail Alberto.Palaia@ekud.gr.ch

Responsabladad: Departament d'educaziun, cultura e protecziun da l'ambient