Il project «5. Parlament grischun da mattas*» dal Post da stab per l'egualitad da las schanzas per dunnas ed umens dal chantun Grischun (STAGL) è vegnì nominà per ils Innovation in Politics Awards 2026. La nominaziun ha gì lieu en las categorias «Democracy» ed «Education».

Ils premis Innovation in Politics Awards undreschan projects politics da tut l'Europa che promovan e rinforzan cun propostas innovativas la democrazia e la furmaziun politica. Il Parlament grischun da mattas* è vegnì accentuà sco project exemplaric per l'innovaziun politica ed acceptà en la procedura da selecziun internaziunala.

Barbara Wülser, manadra da la STAGL, sa legra da la renconuschientscha: «La nominaziun undrescha l'engaschament da las dunnas giuvnas e da tut las persunas participadas che s'engaschan a favur da la participaziun politica e da l'egualitad da las schanzas. Il Parlament grischun da mattas* mussa tge furma concreta ed efficazia che l'educaziun politica po survegnir».

Ils projects vegnan examinads d'ina giuria da passa 1000 burgaisas e burgais europeics. Las finalistas ed ils finalists vegnan envidads a la surdada dals premis che ha lieu ils 30 d'october 2026 a Cascais, la chapitala europeica da la democrazia 2026. Là vegnan communitgads ils projects victurs.

Infurmaziuns:

Barbara Wülser, manadra dal Post da stab per l'egualitad da las schanzas per dunnas ed umens, tel. +41 81 257 35 70, e‑mail Barbara.Wuelser@stagl.gr.ch

Responsabladad: Post da stab per l'egualitad da las schanzas per dunnas ed umens