Ils chantuns Grischun, Son Gagl e Turgovia cuntinueschan cun il manaschi d'emprova dad e-voting cun il sistem da la Posta svizra. Las experientschas cun e-voting èn positivas. Il sistem è segir e stabil. Dapi l'onn 2023 è el sa cumprovà en tut las votaziuns ed elecziuns.

Ils chantuns Son Gagl e Turgovia utiliseschan il sistem dad e-voting da la Posta dapi ils 18 da zercladur 2023, il chantun Grischun dapi ils 3 da mars 2024. Er a chaschun da l'ultima votaziun dals 8 da mars n'hai dà nagins problems cun l'applicaziun. Las votantas ed ils votants, las vischnancas sco er las Svizras ed ils Svizzers a l'exteriur beneventan e stiman il e-voting.

Il cas en il chantun Basilea-Citad n'ha da far nagut cun il sistem dad e-voting sco tal, mabain è d'attribuir al diever d'ina cumponenta externa (clavetta USB). In sbagl tar il sistem dad e-voting, che vegn manà da la Posta svizra, po vegnir exclus. Ils chantuns vegnan ad analisar il cas ensemen cun la Chanzlia federala e cun la Posta e vegnan ad optimar vinavant ils process.

Il e-voting è vinavant en la fasa d'emprova, cun la finamira da rimnar experientschas praticas sco er da meglierar e sviluppar vinavant cuntinuadamain ils andaments ed ils process. Ord vista dals chantuns èsi perquai cunvegnent da cuntinuar cun quest manaschi d'emprova.

Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch.

Infurmaziuns:

Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 14.00 fin las 16.00), e‑mail Daniel.Spadin@staka.gr.ch

Responsabladad: Chanzlia chantunala