Ils chantuns Grischun, Son Gagl, Turgovia, Appenzell Dadens ed Appenzell Dadora sco er il Principadi da Liechtenstein han analisà dapi la primavaira 2025 l'utilisaziun da l'intelligenza artifiziala (IA) en l'administraziun publica. En quest connex han ins eruì divers champs d'applicaziun potenzials che duain – en in proxim pass – vegnir examinads pli detagliadamain.

La finamira da l'analisa è stada quella, d'identifitgar pussaivladads concretas d'utilisar la IA sco er da giuditgar questas pussaivladads d'applicaziun areguard lur potenzial. Per quest intent han ils chantuns ed il Principadi da Liechtenstein elavurà ina survista sistematica e cumplessiva dals champs d'applicaziun, nua che la IA meglierescha ils servetschs per las burgaisas ed ils burgais sco er per las interpresas u nua ch'ils process daventan pli effizients cun la IA. Tut en tut han ins rimnà, categorisà e descrit pli che 120 cas d'applicaziun. Mintga cas d'applicaziun è er vegnì valità in'emprima giada areguard ses niz, sia realisabladad ed eventualas ristgas.

Bler potenzial per la IA en l'administraziun publica
La IA po vegnir applitgada sco assistenza generala da biro, per dar scleriments e perfin sco agid per prender ina decisiun sin basa da datas. Plinavant han ins er analisà pli precisamain differentas funcziuns da la IA, sco per exempel la tschertga semantica, l'identificaziun da musters u l'elavuraziun da prognosas. Ils resultats èn vegnids integrads en ina survista interactiva. Las enconuschientschas ch'ins ha rimnà davart las pussaivladads d'applitgar la IA en l'administraziun duain vegnir rendidas accessiblas a la publicitad. La survista è ina collecziun d'ideas. Per realisar in cas d'applicaziun dovri ina valitaziun pli detagliada.

Ils resultats mussan, ch'igl exista in grond potenzial per render ils servetschs administrativs pli effizients e pli efficazis cun agid da sistems dad IA. A medem temp han ins badà, che quests sistems ston ademplir autas pretensiuns. Plinavant renda l'applicaziun da la IA mo, sche las soluziuns pon vegnir utilisadas da bleras unitads.

Il barat cumprovà davart la IA cuntinuescha
Il concept interchantunal è sa mussà sco gronda plivalur dal project. Uschia han ils tschintg chantuns ed il Principadi da Liechtenstein pudì structurar lur experientschas e profitar da sinergias. Sin fundament dal success cuntanschì vulan els er collavurar en l'avegnir ed examinar, actualisar e cumplettar regularmain la collecziun e la valitaziun da quels cas d'utilisar la IA, ch'els han elavurà cuminaivlamain. Els han er previs da barattar periodicamain lur experientschas davart la realisaziun da projects dad IA.

Il Grischun definescha princips per utilisar la IA
Sin basa da l'analisa dal potenzial da la IA ha la Regenza grischuna definì princips e secturs d'activitad per utilisar l'intelligenza artifiziala en l'administraziun chantunala. In punct central en quest connex è l'applicaziun da la IA en moda responsabla, transparenta e confurm als princips dal stadi da dretg en l'administraziun. Ina finamira impurtanta da l'administraziun chantunala èsi er d'accumpagnar las collavuraturas ed ils collavuraturs durant ch'els emprendan e tiran a niz tecnologias dad IA. I èn gia vegnids realisads emprims projects da pilot en l'administraziun chantunala dal Grischun per obtegnair experientschas davart il diever e davart la realisaziun tecnica da tecnologias da la IA. Sin fundament da l'analisa dal potenzial da la IA vegnan ussa priorisads cas d'applicaziun concrets che han ina plivalur considerabla.

Agiunta:

Survista interactiva

Infurmaziuns:

Marc Heuberger, manader dal Post da stab Administraziun digitala, tel +41 81 257 32 02 (cuntanschibel da las 14.00 fin las 15.30), e‑mail Marc.Heuberger@dfg.gr.ch

Responsabladad: Post da stab Administraziun digitala