La Cumissiun per ambient, traffic ed energia dal Cussegl grond (CATE) è entrada unanimamain en la revisiun totala da la Lescha introductiva tar la Lescha federala davart il traffic sin via (LItLTV) e sustegna las novas basas per calcular la taglia sin il traffic stradal.
Sut la direcziun da la presidenta da la cumissiun Anita Mazzetta ed en preschientscha dal cusseglier guvernativ Peter Peyer, schef dal Departament da giustia, segirezza e sanadad, ha la CATE predeliberà la missiva da la Regenza tar la revisiun totala da la LItLTV. Cun questa revisiun duai la taglia da traffic vegnir adattada a las novaziuns tecnologicas. (cf. communicaziun a las medias da la Regenza).
Novas basas per calcular la taglia sin il traffic stradal èn incontestadas
La cumissiun è entrada unanimamain en il project, perquai che las basas per calcular la taglia sin il traffic stradal ston vegnir adattadas pervia dal svilup tecnic dals automobils. En l'avegnir duain la paisa e / u la prestaziun esser decisivas per l'autezza da la taglia. En quest connex vegnan las differenzas tranter motors termics e vehichels electrics cumpensadas, per gulivar en spezial il dischavantatg dal pais da vehichels electrics. Vehichels che n'emettan nagin CO₂ e tals che na retiran betg lur energia da propulsiun d'in motor termic (plugin), profiteschan fin la fin dal 2034 vinavant da las reducziuns da taglia. Perquai ch'i n'è betg pussaivel da prevesair il svilup tecnic per in spazi da temp pli lung, duai la nova lescha er porscher ina tscherta flexibilitad per pudair s'adattar a novas circumstanzas. Ultra da quai èsi gia oz previs d'examinar la lescha en 10 onns per analisar criticamain las basas da calculaziun e per pudair adattar quellas puspè ad eventuals novs progress tecnics.
Propostas da maioritad e da minoritad da la cumissiun
La CATE è sa fatschentada intensivamain cun il project. Da la discussiun èn resultadas propostas da midada. Uschia propona ina maioritad da la cumissiun d'adattar la taglia da traffic a la chareschia. Propostas da minoritad pretendan d'excluder vehichels da plugin da la reducziun da la taglia, da suttametter er il traffic public a la taglia e da cumpensar eventuals surplis tar la taglia sin il traffic stradal cun reducziuns.
Il Cussegl grond vegn a tractar questa fatschenta en la sessiun d'avrigl 2026.
Infurmaziuns:
Anita Mazzetta, presidenta da la Cumissiun per ambient, traffic ed energia, tel. +41 76 500 48 18, e‑mail anita.mazzetta@gruene-gr.ch
Responsabladad: Cussegl grond / Cumissiun per ambient, traffic ed energia