En connex cun arrestaziuns dad Europol en Frantscha ed en l'Italia il favrer passà, ha il Departament da giustia, segirezza e sanadad sclerì, sche las permissiuns da dimora vegnan concedidas legalmain en il chantun Grischun.

Las examinaziuns dal departament han mussà, che l'Uffizi da migraziun e da dretg civil (UMDC) ha decidì en moda suandabla e legala. Il UMDC ha ademplì da maniera consequenta sia incumbensa en il process da permissiun sin basa da las disposiziuns legalas vertentas. In avis dal chantun Tessin davart eventuals entretschaments criminals hai dà pir, suenter che l'uffizi aveva concedì las permissiuns da dimora.

Er cura che l'Uffizi federal da polizia (fedpol) è sa drizzà al UMDC, aveva quel gia concedì la permissiun. Da retrair la permissiun n'è betg stà giustifitgà quel mument tenor la valitaziun dal UMDC. Eventualmain avess quai pudì periclitar las investigaziuns dal fedpol. Actualmain examinescha il UMDC en enclegientscha cun il fedpol da revocar las permissiuns da dimora da las persunas arrestadas. Perquai ch'i sa tracta d'ina procedura currenta, na pon vegnir communitgads nagins ulteriurs detagls. Ils uffizis e las autoritads participadas examineschan però cuntinuadamain lur process e l'optimaziun da la collavuraziun.

Sensibilisaziun e collavuraziun da las autoritads
«Il cas mussa, quant impurtant ch'igl è che las collavuraturas ed ils collavuraturs da las differentas autoritads sajan sensibilisads per il tema da la criminalitad organisada, e quai da l'Uffizi dal register da commerzi a l'Uffizi da migraziun, da la vischnanca sur il chantun fin a la Confederaziun», di il cussegl guvernativ Peter Peyer. «Però ston las autoritads sa tegnair vi da las basas legalas.»

Il tema da la criminalitad organisada na pertutgia insumma betg mo il chantun Tessin u il Grischun, mabain l'entira Svizra. «La criminalitad organisada na sa ferma betg als cunfins ed è, tenor ses esser, adina a la tschertga da foras.» En il cas qua avant maun han ins pudì realisar in'acziun da success cunter la criminalitad organisada grazia a la buna collavuraziun (inter)naziunala.

Agiunta:

Strategie der Schweiz gegen organisierte Kriminalität

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad. Las dumondas vegnan coordinadas da Ursina Trautmann, responsabla per la communicaziun dal Departament da giustia, segirezza e sanadad, tel. +41 79 712 51 57, e‑mail Medienstelle@djsg.gr.ch.

Responsabladad: Departament da giustia, segirezza e sanadad