Sco gia l'onn 2024 han ins cumprovà er l'onn 2025 cas da tuberculosa tar plirs tschiervs en il Vorarlberg, betg lunsch davent dal cunfin grischun. La ristga che la populaziun da selvaschina indigena en il Partenz pudess s'infectar, resta perquai gronda. Per quest motiv cuntinuescha il chantun Grischun cun las mesiras da surveglianza ch'eran vegnidas concludidas l'atun 2024.
L'onn 2025 han ins cumprovà la tuberculosa tar quatter tschiervs ch'èn vegnids sajettads en ils territoris Löruns e Vandans (Tschöppaalpe). Cunzunt il territori Tschöppaalpe è situà fitg datiers dal cunfin grischun ed ha in trutg da selvaschina intensiv cun il Partenz. Er en las ulteriuras regiuns dal Vorarlberg n'è la situaziun fin ussa betg sa calmada – là hai dà pliras giadas transmissiuns en populaziuns d'animals da niz.
Il territori d'observaziun resta
En enclegientscha cun l'Uffizi da chatscha e pestga (UCP) sco er cun l'Uffizi federal da segirezza alimentara e fatgs veterinars (USAV) prolunghescha l'Uffizi per la segirezza da victualias e per la sanadad d'animals (USVA) il territori d'observaziun existent fin la fin da l'onn 2027. En quest territori ston tschiervs sajettads e chattads morts vegnir examinads sin tuberculosa.
Il territori d'observaziun correspunda a quel da l'onn 2024 e cumpiglia ils territoris communals da Seewis, Grüsch, Schiers, Luzein, Küblis sco er la fracziun Saas a Claustra, che sa chattan al nordost da la Landquart. En quest perimeter vegn examinada in'emprova da controlla sin tuberculosa tar ils tschiervs sajettads durant la chatscha auta e durant la chatscha speziala.
Nagins cas da tuberculosa en il Grischun
En il rom da las mesiras da surveglianza èn vegnids examinads l'onn 2024 sin tuberculosa 50 da 58 animals sajettads durant la chatscha speziala. L'onn 2025 èn vegnids sajettads tut en tut 255 tschiervs durant l'entira chatscha en quest territori e 94 da quels èn vegnids examinads. La finamira da prender emprovas da var 30 pertschient da tut ils tschiervs sajettads è uschia vegnida cuntanschida. En nagina da las emprovas dals onns 2024 e 2025 n'è vegnida cumprovada la tuberculosa.
Las experientschas han mussà, che questas mesiras pretensiusas pon mo vegnir realisadas grazia a la stretga collavuraziun cun l'Uniun grischuna da chatschadras e chatschaders da patenta (UGCP), cun las chatschadras ed ils chatschaders sco er cun l'Uffizi da chatscha e pestga (UCP). La finamira cuminaivla è quella d'identifitgar a temp in eventual import da la tuberculosa e d'impedir uschia ina derasaziun entaifer la populaziun da selvaschina sco er ina transmissiun sin effectivs d'arments.
Er il scumond da pavlar resta en vigur
Ultra dals cas en vischinanza dal cunfin en il Montafon èn ulteriuras regiuns en il Vorarlberg ed en il Tirol pertutgadas da tuberculosa. Per quest motiv fan ils territoris da cunfin da questas regiuns dapi l'onn 2016 part dal territori da surveglianza da la tuberculosa, nua ch'i vala in scumond per persunas privatas da pavlar selvaschina d'ungla (tschiervs, chavriels, chamutschs, capricorns).
Ulteriuras infurmaziuns èn disponiblas sin la pagina d'internet dal USVA sut «Tuberkulose beim Wild».
Agiunta:
Charta cun territori d'observaziun e scumond da pavlar
Infurmaziuns:
Giochen Bearth, manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 10.00 fin las 12.00), e‑mail Giochen.Bearth@alt.gr.ch
Responsabladad: Uffizi per la segirezza da victualias e per la sanadad d'animals