A partir dal 1. da matg 2026 cuntanschan ins l'Agid a victimas en l'entira Svizra sur il numer naziunal da l'Agid a victimas 142. Quest numer da telefon gratuit porscha a persunas che han subì violenza, sco er a lur confamigliars, da tuttas uras agid ed ina cussegliaziun bain accessibla e confidenziala. Er il chantun Grischun sa participescha a questa purschida naziunala.

Tut las persunas en Svizra ch'èn vegnidas blessadas corporalmain, psichicamain u sexualmain tras in delict, han il dretg da survegnir sustegn ed agid. Mintga victima duai – independentamain da ses lieu da domicil – survegnir access a la cussegliaziun ed al sustegn ch'ella dovra.

Per tgi è pensà il numer da l'Agid a victimas 142?
Il numer da l'Agid a victimas 142 sa drizza a persunas, che han subì violenza fisica, psichica u sexuala en il spazi privat u public. El è in post da consultaziun gratuit, cuntanschibel da tuttas uras (24/7), bain accessibel e confidenzial. Er ils confamigliars e las persunas da confidenza da las victimas da violenza pon survegnir sustegn tras l'Agid a victimas.

Persunal da cussegliaziun scolà porscha sustegn da di e da notg tenor standards e process unitars. Uschia survegnan tut las persunas ina cussegliaziun fidada e d'auta qualitad – independentamain da tge chantun ch'ellas telefonan. A medem temp vegn garantida ina stretga collavuraziun cun las purschidas chantunalas existentas da l'Agid a victimas.

Plinavant stat l'Agid a victimas a disposiziun, saja quai ch'ina denunzia penala è vegnida suttamessa u ch'il delinquent è vegnì eruì respectivamain la delinquenta è vegnida eruida. I na gioga er nagina rolla, sch'il delict è vegnì commess cun intenziun u per negligientscha.

Infurmaziun impurtanta: Nagin numer d'urgenza
Il numer da l'Agid a victimas 142 na remplazza nagins numers d'urgenza. En ina situaziun da privel acuta As drizzai adina a la polizia (117) u als servetschs da salvament (144). L'access a las purschidas d'agid da la polizia e d'auters posts d'intervenziun en cas da crisa è pussaivel da tut temp sur ils chanals d'urgenza existents.

Ils chantuns garanteschan da tuttas uras ina purschida da cussegliaziun. Durant las uras da biro vegnan ils cloms al numer 142 tramess directamain vinavant al Post chantunal da cussegliaziun per l'agid a victimas. Ordaifer las uras da biro procuran ils chantuns, ch'ils cloms arrivian adina tar in team scolà.

Soluziun regiunala per il Grischun
Per realisar la cuntanschibladad sa basa il chantun Grischun sin cooperaziuns cun ulteriurs chantuns. Ils chantuns Appenzell Dadora, Appenzell Dadens, Glaruna, Grischun (tudestg) e Son Gagl èn s'unids ad ina soluziun cuminaivla. Durant ils lavurdis, mintgamai da di, respundan ils singuls chantuns, sur lur posts chantunals d'agid a victimas, ils cloms; en il Grischun vegn quai fatg tras l'Agid a victimas dal Grischun. Da notg e durant las fins d'emna prenda la Fundaziun Chasa da dunnas Son Gagl encunter ils cloms per tut ils tschintg chantuns.

Per ils cloms talians che arrivan ordaifer las uras da biro da l'Agid a victimas dal Grischun, collavura il chantun Grischun stretgamain cun il chantun Tessin. Ils cloms vegnan respundids da notg e durant las fins d'emna tras il terz offerent «Federazione Cantonale Ticinese Servizi Autoambulanze» (FCTSA).

Agiunta:

©Conferenza da las directuras e dals directurs chantunals dals affars socials da la Svizra orientala

Infurmaziuns:

• Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 10.00 fin las 11.00), e‑mail Susanna.Gadient@soa.gr.ch
• Madlaina Baselgia, manadra dal Post da coordinaziun Violenza a chasa, tel. +41 81 257 26 11 (cuntanschibla da las 10.00 fin las 11.00), e‑mail Madlaina.Baselgia@soa.gr.ch

Responsabladad: Uffizi dal servetsch social

Numer da l'Agid a victimas 142

• A partir dal 1. da matg 2026 pon ins cuntanscher l'Agid a victimas da violenza en l'entira Svizra sur il numer curt 142.
• Purschida: Cussegliaziun gratuita, confidenziala e cuntanschibla da tuttas uras per persunas che han subì violenza fisica, psichica u sexuala, sco er per lur confamigliars.
• Prestaziun: Persunas spezialisadas scoladas sustegnan las persunas pertutgadas e renvieschan en cas da basegn ad ulteriurs posts cumpetents (p.ex. posts chantunals da cussegliaziun a victimas).
• Infurmaziun: Il numer 142 n'è betg in numer d'urgenza. En cas d'ina situaziun da privel acuta: polizia (117) u servetsch da salvament (144).