In term impurtant è cuntanschì: cun l'emprima siglientada dad oz cumenzan las lavurs da perfuraziun per il nov tunnel Las Ruinas sin la via dal Lucmagn. La cussegliera guvernativa Carmelia Maissen punctuescha, che l'ovra saja in element central per renovar questa colliaziun impurtanta tranter il Grischun ed il Tessin uschia, che la via daventia segira e persistenta. Igl è previs d'avrir il tunnel l'onn 2029.

Sin il traject Las Ruinas tranter Mustér e Curaglia na correspunda la via existenta betg pli a las pretensiuns actualas. La posiziun topografica pretensiusa, la periclitaziun tras crudada da crappa e tras auters eveniments da la natira sco er il trassé nunsurvesaivel restrenschan la segirezza dal traffic. Decisiv per il nov tunnel è cunzunt il stadi architectonic dal tunnel vegl e da las gallarias existentas che na satisfan betg pli a las pretensiuns actualas.

Dapli segirezza e fidadadad
La correcziun da la via dal Lucmagn permetta oravant tut da meglierar la segirezza dal traffic, da reducir la periclitaziun tras privels da la natira e d'optimar il trassé. «Cun construir il nov tunnel Las Ruinas investin nus sapientivamain en la segirezza ed en la fidadadad da nossa infrastructura da traffic. A medem temp rinforzain nus la cuntanschibladad da nossas regiuns perifericas e stgaffin premissas impurtantas per lur svilup economic e social», suttastritga la cussegliera guvernativa Carmelia Maissen, scheffa dal Departament d'infrastructura, energia e mobilitad, l'impurtanza da quest project.

Construir durant ch'il traffic circulescha
Il tunnel d'ina lunghezza da var 490 meters vegn plazzà parallelamain al traject existent. Questa moda da construcziun ha avantatgs decisivs per las participantas ed ils participants dal traffic: Durant il temp da construcziun resta il tunnel existent per gronda part en funcziun, uschia che las restricziuns pon vegnir minimadas. L'inschigner chantunal Reto Knuchel declera en chaussa: «Nus construin sut cundiziuns pretensiusas e cun prender il pli grond resguard pussaivel da las participantas e dals participants dal traffic. Quai è ina sfida ed a medem temp ina fermezza da quest project.»

Las lavurs da construcziun per il tunnel Las Ruinas vegnan realisadas en etappas fin a la finiziun l'onn 2029. Ils onns suandants èn previsas ulteriuras mesiras tranter Las Ruinas e la punt dal Rain da Medel (guardar agiunta «Info dal UCB»). Ils custs per il nov tunnel importan circa 32 milliuns francs. Igl è previs da terminar l'entir project l'onn 2036. La Regenza aveva gia approvà il project il settember 2018 (guardar communicaziun da la Regenza dals 27-09-2018).

Fotografias agiuntadas:

Maletg 1: Il vegl tunnel Las Ruinas

Maletg 2: Qua vegn construì il portal sid

Agiunta:

Info dal UCB dals 6 da matg 2026

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel ils 06-05-2026 da las 15.30 fin las 16.30 sco er ils 07-05-2026 da las 08.30 fin las 09.30 e da las 13.30 fin las 14.30), e‑mail Reto.Knuchel@tba.gr.ch

Responsabladad: Uffizi da construcziun bassa