La Regenza grischuna ha prendì enconuschientscha dal rapport final e dal quint final dal concept da traffic dal Grischun per ils Gieus olimpics d'enviern Milano Cortina 2026. Ils custs per il concept da traffic èn stads per passa 35 pertschient pli bass che supponì oriundamain.
Il concept da traffic dal Grischun per ils Gieus olimpics d'enviern Milano Cortina 2026 ha custà tut en tut 3,48 milliuns francs. Pertge cun adattaziuns flexiblas al dumber da visitadras e visitaders durant l'occurrenza han ins pudì reducir ils custs spetgads per l'occurrenza per passa 35 pertschient. La Regenza aveva concedì l'october 2025 in credit brut da 5,5 milliuns francs respectivamain da 4,6 milliuns francs senza atgnas prestaziuns (guarda la communicaziun a las medias dals 15-12-2025). La planisaziun da las mesiras sa basava sin las indicaziuns dals organisaturs talians davart il dumber da visitadras e visitaders.
Areguard la finanziaziun è il chantun pront da surpigliar sez las atgnas prestaziuns da var 0,9 milliuns francs. Ils custs da 2,58 milliuns francs che l'occurrenza ha chaschunà, duain dentant vegnir surpigliads da l'Italia tenor il princip dal chaschunader. «Il chantun Grischun vegn ad infurmar la regiun Lumbardia davart ils custs effectivs ed ad intimar ella da pajar quels», di la cussegliera guvernativa Carmelia Maissen, scheffa dal Departament d'infrastructura, energia e mobilitad.
Concept da traffic ha funcziunà
Durant ils Gieus olimpics d'enviern Milano Cortina dals 6 fin ils 22 da favrer 2026 han stgars 41 000 visitadras e visitaders nizzegià il traffic public per arrivar e partir tranter Zernez / Müstair e Livigno (I) (guarda la communicaziun a las medias dals 22-02-2026). Als dis da grond traffic èn 2500 persunas viagiadas cun il traffic public da la Svizra en l'Italia. L'appel da duvrar ils meds da transport publics per arrivar al lieu ha mussà effect: Bleras aspectaturas ed aspectaturs han midà sin il traffic public u han fatg l'entir viadi cun quel. Ils impediments da traffic ch'ins ha temì ordavant en la regiun n'hai betg dà grazia al concept da traffic.
Perquai ch'igl è vegnì duvrà fermamain il traffic public ed il dumber da visitadras e visitaders è stà considerablamain pli pitschen, èn er las plazzas da parcar da park and ride stadas main occupadas. Uschia han ins incassà cun var 80 000 francs (70 francs al di custava ina plazza da P+R, exclusiv TPV) cleramain pli pauc che supponì oriundamain. Cun adattaziuns a curta vista, sco per exempel cun serrar il parcadi Zernez Sid u reducir ils servetschs da traffic als lieus main frequentads, han ins pudì spargnar custs.
Experientschas utilas per il futur
Las experientschas cun il concept da traffic per ils Gieus olimpics d'enviern 2026 servan sco enconuschientschas utilas per occurrenzas grondas futuras en il chantun Grischun. La stretga collavuraziun tranter las differentas organisaziuns en Svizra ed en l'Italia saja stada d'impurtanza decisiva per il success dal concept da traffic, hai num en il rapport final ch'è vegnì fatg dals responsabels da la Polizia chantunala, da l'Uffizi d'energia e da traffic sco er da l'Uffizi da construcziun bassa. Cun integrar tut ils partenaris han ins stgaffì cleras cumpetenzas ed evità intschertezzas. D'impurtanza centrala èsi – uschia in'ulteriura conclusiun – da sa focusar a temp sin la fasa preparatorica e da realisar ina strategia da communicaziun proactiva.
Agiunta:
Rapport final dals Gieus olimpics d'enviern Milano Cortina 2026
Infurmaziuns:
Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 12.30 fin las 13.30), e‑mail Carmelia.Maissen@diem.gr.ch
Responsabladad: Regenza