La Cumissiun dal Cussegl grond per politica da stadi e strategia (CPSS) ha predeliberà il segund rapport davart l'efficacitad da la gulivaziun da finanzas per las vischnancas grischunas. La revisiun parziala da la Lescha davart la gulivaziun da finanzas ch'è cuntegnida en quest rapport approvescha ella senza propostas da midada.

Sut la direcziun dal president da la cumissiun Kevin Brunold ed en preschientscha dal president da la Regenza Martin Bühler, schef dal Departament da finanzas e vischnancas, ha la CPSS predeliberà la missiva da la Regenza en connex cun il segund rapport davart l'efficacitad da la gulivaziun da finanzas per las vischnancas grischunas 2021 fin 2026 sco er en connex cun la revisiun parziala da la Lescha davart la gulivaziun da finanzas (communicaziun a las medias da la Regenza). La CPSS ha constatà, che la gulivaziun da finanzas funcziuna da princip bain per las vischnancas grischunas. Ils agiustaments punctuals che la Regenza ha proponì en connex cun la gulivaziun da las grevezzas geografic-topograficas e da scola (quotas da scolaras e scolars surproporziunalmain autas duain vegnir valitadas pli fitg e da nov duai er l'autezza da l'abitadi vegnir resguardada sco factur da custs) sustegna ella unanimamain, medemamain er las adattaziuns en connex cun la gulivaziun individuala d'inegualitads per grevezzas spezialas.

Midadas pli grondas stattan davant porta
Uschè bain sco che la gulivaziun da finanzas ademplescha oz ses intent, uschè malsegira è la concepziun futura. Las novaziuns en il dretg fiscal che vegnan ad avair lieu pervia da las votaziuns federalas dal pievel (aboliziun da la valur da l'atgna locaziun cun in'eventuala cumpensaziun tras ina nova taglia reala, introducziun d'ina imposiziun da taglia individuala) vegnan – tut tenor la moda da realisaziun – ad avair in effect pli pitschen u pli grond sin las finanzas da las vischnancas – ed uschia er sin la gulivaziun da finanzas. Ils proxims onns vegn la gulivaziun da finanzas a stuair vegnir discutada da nov sin plaun politic, en spezial areguard ils criteris da calculaziun per il potenzial da resursas da las vischnancas. Sut l'aspect da questa situaziun da partenza è la CPSS perquai da la ferma persvasiun, ch'i na fetschia nagin senn da midar oz insatge vi da la calculaziun dal potenzial da resursas. Anzi, ins sto spetgar fin che las malsegirezzas èn scleridas ed alura lantschar ina nova debatta politica davart la gulivaziun da finanzas.

La fatschenta vegn tractada dal Cussegl grond en la sessiun da zercladur 2026.

Infurmaziuns:

Kevin Brunold, president da la Cumissiun per politica da stadi e strategia, tel. +41 78 847 62 68, e‑mail kevin.brunold@icloud.com

Responsabladad: Cussegl grond / Cumissiun per politica da stadi e strategia