Trais maturandas da la Scola chantunala grischuna èn vegnidas undradas per lur lavurs da maturitad che han in connex cun la plurilinguitad. Questa distincziun duai promover la plurilinguitad dal chantun. Il premi vegn surdà mintg'onn per lavurs da maturitad excellentas, che vegnan elavuradas en gimnasis grischuns.
La plurilinguitad dal Grischun è in element central da l'identitad dal chantun. Cun premiar lavurs da maturitad che tematiseschan en moda scientifica ed en il champ d'applicaziun las linguas chantunalas, promova il Post spezialisà per la plurilinguitad dal Departament d'educaziun, cultura e protecziun da l'ambient (DECA) la varietad linguistica en il chantun sco er l'occupaziun cun las identitads culturalas ed istoricas. Ils premis èn vegnids surdads persunalmain dal cusseglier guvernativ Jon Domenic Parolini en il tschaler da la Chasa grischa. Las trais maturandas premiadas han dastgà retschaiver las distincziuns en preschientscha da geniturs e d'amis.
Las titularas dals premis
Las victuras dals premis da quest onn termineschan actualmain il gimnasi a la Scola chantunala grischuna a Cuira.
Salome Valsecchi da Samignun-Compatsch ha analisà en sia lavur «Die Veränderungen des Samnaunerdialekts in den letzten 50 Jahren», co che l'unic dialect tudestg betg aleman da la Svizra è sa sviluppà e tge restanzas da linguas anteriuras ch'èn anc derasadas en il territori da Samignun. Per quest intent ha ella fatg in'analisa qualitativa e quantitativa. (Premi: 1000 francs)
Nadia Schütz da Falera ha scrit en sia lavur «Creaziun d’in cudisch per famiglias cun affons-steila» in carnet triling (sursilvan, rumantsch grischun e tudestg) sco accumpagnament per famiglias ch'èn confruntadas cun la perdita d’in uschenumnà uffant-staila. Ina part dal carnet sa drizza a fragliuns (istorgia en lingua simpla cun atgnas illustraziuns) ed en ina segunda part a geniturs. La lavur mussa er bain las differenzas ed ils tratgs cuminaivels dal sursilvan e dal rumantsch grischun. (Premi: 500 francs)
Anna Rodigari da Müstair ha creà en sia lavur «Ils sgrafits in Val Müstair – ün gir tras ils cumüns» in carnet triling (vallader, tudestg ed englais) per pudair chapir ed interpretar meglier ils sgrafits vi da differentas chasas da la Val Müstair. Il carnet è in bun accumpagnader per las visitadras ed ils visitaders sco er per las persunas indigenas che s'interessan per las picturas tipicas vi da las chasas en la val. (Premi: 200 francs)
La plurilinguitad chantunala fa part dal mintgadi en ils gimnasis grischuns. Mintg'onn tematiseschan in pèr scolaras e scolars quella en lur lavur da maturitad. Uschia er nossas trais titularas dals premis. «Las lavurs premiadas perscruteschan fenomens linguistics da noss chantun multifar, èn plurilingas ed han in niz pratic. L'engaschament persunal da las auturas è fitg impressiunant», sa legra il cusseglier guvernativ Jon Domenic Parolini. La concurrenza vegn publitgada mintg'onn e sa drizza a tut las maturandas ed ils maturands dals gimnasis grischuns, che termineschan lur lavur da maturitad mintgamai la primavaira.
Fotografia:
Foto 02
Las victuras cun il cusseglier guvernativ Jon Domenic Parolini ed Alberto Palaia, delegà dal Post spezialisà per la plurilinguitad.
Infurmaziuns:
Alberto Palaia, delegà dal Post spezialisà per la plurilinguitad, tel. +41 81 257 44 65 (cuntanschibel da las 11.00 fin las 12.00), e‑mail Alberto.Palaia@ekud.gr.ch
Responsabladad: Departament d'educaziun, cultura e protecziun da l'ambient / Post spezialisà per la plurilinguitad