Il chantun Grischun prenda en mira ina pestga che respecta meglier l'ambient e che s'orientescha pli fitg al futur. En il rom d'ina revisiun parziala da la Lescha chantunala da pestga vul el promover questas finamiras. La consultaziun tar la revisiun parziala cumenza ils 19 da zercladur 2026.

Ils puncts centrals da la revisiun parziala èn l'introducziun d'in attest obligatoric davart las enconuschientschas da la materia per tut las pestgadras e tut ils pestgaders – cun excepziun da giuvenils tranter 14 e 18 onns sco er da giasts sut surveglianza –, quai per garantir in tractament adequat dals peschs. Plinavant prevesa in nov sistem d'impuls da reducir las taxas da patenta per quellas pestgadras e quels pestgaders che tgiran u revaliteschan cumprovadamain spazis da viver, vul dir che absolvan uschenumnadas uras da tgira.

La strategia da repopular las auas cun peschs vegn adattada en la revisiun parziala ad in management da la pestga modern, che sa basa sin las trais pitgas management dals spazis da viver, regulaziun da las prelevaziuns e repopulaziun sistematica da las auas cun peschs. La qualitad da la scolaziun vegn segirada tras cunvegnas da prestaziun, per pudair garantir ina purschida da scolaziun attractiva en tut las regiuns. Cun precisar las obligaziuns da cumpensaziun en cas d'intervenziuns tecnicas en las auas vegn rinforzada la protecziun dal spazi da viver. La precisaziun, ch'il chantun po acquistar ils dretgs spezials da pestga privats a maun liber ubain cun far diever dal dretg d'expropriaziun, procura plinavant per dapli segirezza giuridica. Las cumpetenzas tranter la Regenza, il departament e l'Uffizi da chatscha e pestga vegnan optimadas e gidan uschia a realisar pli effizientamain las mesiras.

«La revisiun parziala ha la finamira d'eliminar mancanzas en il dretg vertent, da realisar propostas che la Federaziun chantunala dals pestgaders grischuns fa dapi blers onns, e d'adattar il regal da pestga a pretensiuns modernas», di la cussegliera guvernativa Carmelia Maissen, scheffa dal Departament d'infrastructura, energia e mobilitad. En il center stattan cleras regulaziuns ch'èn pratitgablas e che resguardan tant ils interess da la pestga sco er la protecziun da las auas e da las populaziuns da peschs.

Consultaziun online sco project da pilot
La consultaziun tar la revisiun parziala da la Lescha chantunala da pestga vegn fatga sin via digitala sco project da pilot. Ella vegn publitgada sco fin ussa en moda regulara en il Fegl uffizial chantunal e dura dals 19 da zercladur 2026 fin ils 19 da settember 2026. Durant quest temp pon las autoritads politicas, federaziuns, organisaziuns, fundaziuns, uniuns, la dretgira e l'administraziun exprimer en scrit lur posiziuns en chaussa. La tractativa dal project en il Cussegl grond è previsa per la sessiun da zercladur 2027. Igl è planisà da metter en vigur il relasch sco er las ordinaziuns appartegnentas il 1. da schaner 2028.

Dapli infurmaziuns tar la consultaziun online: https://e-mitwirkung.gr.ch/rm/

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 15.00 fin las 16.00), e‑mail Carmelia.Maissen@diem.gr.ch
• Marcel Michel, Co-manader da l'Uffizi da chatscha e pestga, tel +41 81 257 38 94 (cuntanschibel da las 10.00 fin las 11.00), e‑mail Marcel.Michel@ajf.gr.ch
  

Responsabladad: Regenza