A partir dals 3 d'avust cumenza la vendita da la patenta da chatscha digitala. Da nov pon ins empustar e pajar online la patenta. Las patentas pon dentant er vinavant vegnir retratgas en ils posts da vendita regiunals da l'Uffizi da chatscha e pestga.
Entant che la vendita digitala da las patenta da pestga è gia s'etablida, porscha l'Uffizi da chatscha e pestga ussa er ina soluziun digitala per la vendita da la patenta da chatscha. La vendita digitala per il nov onn da chatscha cumenza a partir dals 3 d'avust 2026. Ils posts da vendita cumenzan sco usità a partir da mez avust cun la vendita al lieu.
Las chatschadras ed ils chatschaders pon empustar la patenta da chatscha digitala en il ePortal (eportal.gr.ch). Sin questa plattafurma online porscha il chantun Grischun ses servetschs digitals. Uschia n'èn las burgaisas ed il burgais betg pli liads ad in tschert lieu u ad uras d'avertura fixas, sch'ellas ed els han basegn d'in servetsch.
Betg mo la vendita da la patenta da chatscha digitala po vegnir fatga en il futur sur il ePortal. Ulteriurs servetschs da l'Uffizi da chatscha e pestga èn gia oz disponibels sin il ePortal. Sin la plattafurma online pon las utilisadras ed ils utilisaders avrir gratuitamain in agen eConto (guardar «Uschia faschais Vus in eConto»). Tgi che vul per entant mo empruvar ina giada la nova purschida, po testar la procedura d'empustar digitala tranter il 1. ed ils 31 da fanadur 2026. Questas empustaziuns da test na vegnan betg elavuradas vinavant e n'activeschan betg ina patenta da chatscha valaivla. A partir dals 3 d'avust vegn il formular da test remplazzà cun il formular d'empustaziun uffizial.
Patenta digitala mo cun glista da prelevaziun digitala
Gia l'atun 2025 è la glista da prelevaziun digitala vegnida introducida en l'app da chatscha da l'Uffizi da chatscha e pestga. Las chatschadras ed ils chatschaders pon endatar lur prelevaziuns directamain en questa app e transmetter quellas a la surveglianza da chatscha. Tgi che cumpra en l'avegnir ina patenta digitala, survegn quella directamain en l'app. Ins po pia cumprar ina patenta digitala mo, sch'ins dovra la glista da prelevaziun digitala sco app sin il telefonin.
Cumpra da la patenta vinavant pussaivla
Las chatschadras ed ils chatschaders che prefereschan d'avair lur patenta sin palpiri, pon vinavant far diever dals posts da vendita uffizials da las regiuns. Là èsi vinavant pussaivel da pajar la patenta da chatscha cun la carta da credit u cun Twint. A Cuira pon ins vinavant retrair la patenta da chatscha cun pajar en daner constant. Da nov n'è la vendita a Cuira betg pli en il Museum da la natira dal Grischun, mabain en l'edifizi da l'administraziun chantunala «sinergia» (Ringstrasse 10, Cuira). Las infurmaziuns detagliadas davart las uras da vendita èn da chattar sin la pagina d'internet da l'Uffizi da chatscha e pestga.
Dapli infurmaziuns:
Infurmaziuns:
- Dumonda davart la patenta da chatscha digitala:
Marcel Michel, co-manader da l'Uffizi da chatscha e pestga, tel +41 81 257 38 94 (cuntanschibel da las 10.00 fin las 11.30), e‑mail Marcel.Michel@ajf.gr.ch
- Dumondas davart il ePortal:
Flurina Valsecchi, vicemanadra dal Post da stab Administraziun digitala, tel. +41 81 257 32 25 (cuntanschibla da las 10.00 fin las 11.30), e‑mail Flurina.Valsecchi@dfg.gr.ch
Responsabladad: Uffizi da chatscha e pestga
Segir e gratuit: Uschia creais Vus in eConto
Il ePortal (eportal.gr.ch) è la via simpla e segira als servetschs digitals da l'administraziun chantunala dal Grischun. La purschida sin questa plattafurma online vegn engrondida successivamain.
Sin il ePortal pudais Vus avrir gratuitamain in eConto segir. Per far quai duvrais Vus: Voss num e prenum uffizial (sco inditgà en il passaport u en la carta d'identitad), l'adressa dad e-mail, la data da naschientscha, il numer da telefonin sco er in num d'utilisaziun che Vus pudais tscherner libramain ed in pled-clav. Uschespert che Vus essas registrada u registrà, vegnan Vossas datas surpigliadas automaticamain per tut ils servetschs.