Il project «egual21 – Plan d'acziun per l'egualitad» è vegnì terminà cun success suenter ina durada da 5 onns. Cun egual21 han ins vulì francar ina cultura da lavur cumpatibla e senza discriminaziun en l'administraziun chantunala. Manà il project ha il Post da stab per l'egualitad da las schanzas per dunnas ed umens. A partir dal 1. da fanadur 2026 surpiglia l'Uffizi da persunal l'incumbensa da sviluppar vinavant ils temas egualitad e cumpatibilitad en il rom da la Strategia da HR.

Il project egual21 è vegnì lantschà l'onn 2021 cun la finamira da promover l'egualitad e la cumpatibilitad da la professiun cun il temp liber en l'administraziun chantunala. A la fin dal project di il cusseglier guvernativ Jon Domenic Parolini: «egual21 ha sviluppà vinavant cun success l'egualitad e la cumpatibilitad sco temas centrals en l'administraziun e prestà ina contribuziun impurtanta per rinforzar l'administraziun chantunala sco patruna moderna e responsabla.»

La responsabladad è stada en ils mauns dal Post da stab per l'egualitad da las schanzas per dunnas ed umens. A maun d'ina metoda participativa è vegnì sviluppà in «Plan d'acziun per l'egualitad» cun champs d'acziun, finamiras ed in plan da mesiras central. Las unitads administrativas han realisà 324 activitads da quest plan. Per exempel èn l'egualitad e la cumpatibilitad da qua d'envi temas da standard en ils giudicaments annuals da las collavuraturas e dals collavuraturs. Er vegn il sistem da salari declerà ed ils augments da salari èn transparents. Bleras mesiras èn er vegnidas realisadas sin plaun surordinà. En stretga collavuraziun cun l'Uffizi da persunal èn uschia vegnids etablids sustegns structurals: in post per la consultaziun ed annunzia d'incunvegnientschas en il sectur dal persunal, la reducziun da musters da cumportament inconscients u cundiziuns modifitgadas per geniturs, sco l'augment dal congedi da paternitad u il sustegn finanzial per la tgira d'uffants externa. Quest ultim punct è vegnì realisà tras projects da HR parallels. En projects da pilot èn vegnidas sviluppadas mesiras che promovan l'egualitad e la cumpatibilitad, sco per exempel ina meglra planisaziun individuala d'engaschaments da lavur u metodas dal nov mund da lavur. A medem temp ha quai er auzà l'autoefficacitad da collavuraturas e collavuraturs. Grazia a las occurrenzas da rait èn la cumpatibilitad e l'egualitad s'etablidas tar las persunas directivas e tar las collavuraturas ed ils collavuraturs sco tematicas cardinalas cuminaivlas ed impurtantas per l'entira administraziun.

Evaluaziun finala positiva
Il rapport d'evaluaziun dal post extern «Center UND» mussa in svilup positiv da l'egualitad e cumpatibilitad en tut ils secturs examinads. Per exempel è la cumpart da dunnas en l'administraziun chantunala s'augmentada dapi l'onn 2021 da 36 sin 40.2 pertschient. Plinavant èn vegnidas sviluppadas vinavant las cundiziuns generalas da l'organisaziun – per exempel en ils secturs da jobsharing, recrutaziun senza discriminaziuns ubain autonomia temporala e locala.
En il rapport d'evaluaziun vegn l'administraziun chantunala valitada sco per gronda part favuraivla a l'egualitad e cumpatibilitad. Quest resultat legraivel è d'attribuir al fatg che tut ils departaments e servetschs han collavurà e participà a la realisaziun dal plan d'acziun. En cumparegliaziun cun autras administraziuns communalas e chantunalas datti però anc in potenzial da meglieraziun. Per exempel èn las dunnas anc adina sutrepreschentadas, particularmain en posiziuns da cader.

La promoziun da l'egualitad cuntinuescha
En l'avegnir vegnan l'egualitad e la cumpatibilitad sviluppadas vinavant en il rom da la Strategia da HR. En quest rom vegnan sviluppadas mesiras che sa basan sin las recumandaziuns dal rapport d'evaluaziun e che integreschan l'egualitad e la cumpatibilitad anc meglier en la cultura, en la direcziun, en ils process ed en il controlling, per garantir che las mesiras vegnan realisadas en tut ils uffizis e posts da servetsch.

Agiunta:

Rapport d'evaluaziun

Infurmaziuns:

• Il president da la Regenza Martin Bühler, schef dal Departament da finanzas e vischnancas, ed il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, stattan a disposiziun per dumondas en il rom da l'inscunter regular cun las medias dals 30 da zercladur 2026.
• Ulteriuras dumondas vegnan coordinadas da Seraina Hostettler, responsabla per la communicaziun dal Departament da finanzas e vischnancas, tel. +41 81 257 32 05, e‑mail Seraina.Hostettler@dfg.gr.ch

Responsabladad: Regenza