Las dumbraziuns 2026 mussan, che las populaziuns da tschiervs èn sa diminuidas anc ina giada levamain cumpareglià cun l'onn avant. Tar ils chavriels mussan ils resultats populaziuns circa tuttina grondas sco il 2025, per part cun grondas differenzas regiunalas. In dumber fitg grond è danovamain vegnì registrà tar las lieurs brinas. La chatscha gida en moda decisiva a cuntanscher las finamiras ch'èn definidas en la strategia «Spazi da viver guaud-selvaschina 2021».
La stimaziun da las populaziuns da la primavaira 2026 mussa, che la chatscha ha ademplì l'onn passà sia incumbensa da reducir ils dumbers da tschiervs, e quai malgrà in enviern fitg miaivel. La populaziun da tschiervs chantunala vegn stimada sin 13 485 animals. Quai èn 100 animals damain che l'onn avant. «Malgrà l'enviern miaivel cun pauca selvaschina disgraziada èsi danovamain stà pussaivel da reducir levamain las populaziuns da tschiervs en il chantun, cumpareglià cun l'onn avant. Quai è in success ed ina prestaziun grondiusa da las chatschadras e dals chatschaders», di Adrian Arquint, co-manader da l'Uffizi da chatscha e pestga. En ils territoris da test da chavriels èn vegnids dumbrads la primavaira 970 animals. Quai èn 46 chavriels dapli ch'il 2025. Ultra da quai vegnan ils chavriels er dumbrads tar las taxaziuns dals tschiervs. En quest connex han ins registrà quest onn 3088 chavriels (2025: 3302). Quant gronds ch'ils dumbers da chavriels èn effectivamain, vegn pir a sa mussar a maun da la preda da bucs-chavriel da la chatscha auta.
La reducziun da las populaziuns da tschiervs è sin buna via
En la strategia «Spazi da viver guaud-selvaschina 2021» è la reducziun da las populaziuns da selvaschina d'ungla vegnida definida sco mesira impurtanta per meglierar la situaziun chantunala da guaud-selvaschina. Grazia al grond engaschi da las chatschadras e dals chatschaders èsi stà pussaivel da reducir las populaziuns da tschiervs per 17 pertschient (2805 tschiervs), en cumparegliaziun cun l'onn 2020. «En 19 da las 21 regiuns da tschiervs correspunda il svilup dal dumber da tschiervs a la finamira da la strategia «Spazi da viver guaud-selvaschina 2021. Las populaziuns en mira n'èn dentant anc betg cuntanschidas dapertut», di Adrian Arquint. En pliras regiuns è la reducziun en mira vegnida cuntanschida, e las populaziuns pon vegnir stabilisadas sin il nivel actual.
Durant la chatscha da quest onn duain, tenor il plan da prelevaziun chantunal, vegnir sajettads 4616 tschiervs (2025: 4835 tschiervs), quai tar ina cumpart da 2514 animals feminins (2025: 2638). La chatscha da chamutschs e da chavriels ha lieu en la gronda part da las regiuns en il rom dals onns avant. Per la regiuvinaziun persistenta dals guauds èsi en bleras regiuns fitg impurtant, che las chatschadras ed ils chatschaders fetschian er en il guaud ina chatscha intensiva sin chauras-chavriel e sin chamutschs.
Dumbrà blera selvaschina da chatscha bassa
Las populaziuns da selvaschina da chatscha bassa vegnan survegliadas en il Grischun tras in monitoring annual intensiv. Ils emprims resultats da las dumbraziuns da las populaziuns mussan, che tant il dumber da lieurs sco er da giaglinas da draussa è en blers territoris stabil e sin in aut nivel. A chaschun da las dumbraziuns da tschiervs èn vegnidas dumbradas er 1306 lieurs brinas. Quai è la pli gronda quantitad d'animals ch'ins ha dumbrà fin ussa. Las Prescripziuns da chatscha dals onns passads èn sa cumprovadas per ina chatscha persistenta sin questas spezias. Perquai vegnan ellas applitgadas vinavant. Las chatschadras ed ils chatschaders èn conscients da lur responsabladad che resulta tras questa chatscha. Cun lavurs da tgira s'engaschan ellas ed els perquai activamain per questas spezias.
Ulteriuras infurmaziuns:
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 13.00 fin las 14.00 Uhr), e‑mail Carmelia.Maissen@diem.gr.ch
- Adrian Arquint, co-manader da l'Uffizi da chatscha e pestga, Tel. +41 81 257 38 91 (cuntanschibel da las 10.00 fin las 11.30), e‑mail Adrian.Arquint@ajf.gr.ch
Responsabladad: Regenza