Sin il cumenzament dal nov onn d'emprendissadi l'avust 2026 vegn il Portal da la furmaziun professiunala (portal online per manaschis d'emprendissadi) en il chantun Grischun cumplettà cun funcziuns centralas. Centrals per sviluppar vinavant il portal èn stads in nov concept da las rollas e dals dretgs sco er la pussaivladad da passar directamain dal Portal da la furmaziun professiunala al program d'administraziun da scola. Uschia promova l'Uffizi per la furmaziun professiunala (UCFP) la collavuraziun digitala tranter ils manaschis d'emprendissadi, las scolas professiunalas spezialisadas e l'uffizi.
Cun prender en funcziun il Portal da la furmaziun professiunala l'onn 2019 ha il UCFP stgaffì in access digital als servetschs per ils manaschis d'emprendissadi. Tranter auter èsi dapi lura pussaivel d'endatar e d'approvar contracts d'emprendissadi sin via electronica. Cun il nov concept da las rollas e dals dretgs vegnan las cumpetenzas ed ils dretgs d'access al Portal da la furmaziun professiunala reglads en moda pli clera, pli chapaivla e pli unitara. Las differentas gruppas d'utilisaders en ils manaschis d'emprendissadi – administraziun sco er furmaturas e furmaturs professiunals – survegnan sistematicamain quellas funcziuns ed infurmaziuns ch'ellas ed els dovran per ademplir lur incumbensas. Il UCFP ha creà las premissas organisatoricas e tecnicas per pudair applitgar questas rollas en il futur en moda consistenta e optimada als process.
Access direct a las notas senza conto supplementar
Da nov pon ils manaschis d'emprendissadi e las furmaturas ed ils furmaturs professiunals passar directamain dal Portal da la furmaziun professiunala al program d'administraziun da scola, quai per endatar là las absenzas e las notas da las emprendistas e dals emprendists. Grazia a l'integraziun tecnica na dovra il manaschi d'emprendissadi betg in conto supplementar per acceder al program d'administraziun da scola. La premissa per prender invista da las singulas notas è, che las emprendistas ed ils emprendists dettian lur consentiment en il program d'administraziun da scola. Las notas dals attestats da semester pon ils manaschis d'emprendissadi consultar vinavant sin via electronica, senza ina decleraziun da consentiment supplementara da las emprendistas e dals emprendists. Ils manaschis d'emprendissadi ston esser infurmads davart las absenzas da lur emprendistas ed emprendists, quai per ademplir lur obligaziun legala da furmar ed accumpagnar ellas ed els sco er per coordinar lur scolaziun en il manaschi. Cun prender invista da las datas da prestaziun relevantas pon ils manaschis d'emprendissadi accumpagnar meglier il progress d'emprender, identifitgar ad uras il basegn da sustegn e promover il success da la scolaziun. La nova funcziun da l'access direct davent dal Portal da la furmaziun professiunala stat a disposiziun a las scolas professiunalas spezialisadas che dovran in program d'administraziun da scola che dispona da la tecnica per passar dal Portal da la furmaziun professiunala al program d'administraziun da scola. Supplementarmain dovran scolas professiunalas spezialisadas ina licenza respectiva dal purschider dal program d'administraziun da scola. Il program d'administraziun da scola che vegn utilisà il pli savens en las scolas professiunalas spezialisadas dal Grischun, sustegna la nova pussaivladad e stgaffescha uschia ina basa impurtanta per ina collavuraziun digitala unitara.
Ulteriur svilup moderà orientà al futur
Il nov concept da las rollas e la pussaivladad da passadi èn purschidas cumplementaras cun novaziuns ch'èn resultadas dal basegn dals acturs participads. Questas purschidas promovan ina collavuraziun digitala senza interrupziuns e simplifitgeschan ils process da lavur. Ulteriuras infurmaziuns stattan er a disposiziun sin la pagina d'internet dal UCFP.
Infurmaziuns:
Ramon Fontana, manader da la partiziun Surveglianza da la furmaziun professiunala, Uffizi per la furmaziun professiunala, tel. +41 81 257 27 67 (cuntanschibel da las 09.30 fin las 10.30), e‑mail Ramon.Fontana@afb.gr.ch
Responsabladad: Uffizi per la furmaziun professiunala