Cun vasts scleriments geologics per lung dal traject, nua ch'il tunnel Lai da Segl è previs, analisescha l'Uffizi da construcziun bassa dal Grischun actualmain il sutterren. En il center stattan 25 sondagis cun profunditads da fin 140 meters. Ils resultats portan infurmaziuns da basa impurtantas davart la realisabladad tecnica e l'ulteriura projectaziun dal tunnel Lai da Segl.
Per lung dal traject, nua ch'il tunnel è previs, fa l'Uffizi da construcziun bassa (UCB) tut en tut 25 sondagis. Tut tenor il lieu han ils sondagis ina profunditad da 30 fin maximalmain 140 meters. Uschia po il UCB explorar las qualitads a l'intern da la muntogna al lieu dal tunnel previs. «Las enconuschientschas da las analisas èn decisivas per pudair giuditgar fundadamain la realisabladad tecnica dal tunnel e per survegnir ina basa fidada per l'ulteriura projectaziun», declera l'inschigner chantunal Reto Knuchel.
Sondagis mussan la posiziun optimala dal tunnel futur
Cun ils sondagis n'analisescha il UCB betg mo la lingia dal cunfin dal grip, mabain er la furmaziun ed il deposit da la crappa lucca sco er las relaziuns da l'aua sutterrana e da l'aua da muntogna.
Per il mument è il tunnel Lai da Segl previs sin circa il medem nivel d'autezza sco il trassé actual da la via dal Malögia. Sch'ils resultats mussan ch'ins pudess realisar il tunnel en in grip stabil, fiss la construcziun bler pli simpla ed uschia er pli favuraivla, che sch'i sa tractass da crappa lucca. Sch'ils sondagis mussassan dentant, ch'ins stuess far quint cun trajects da crappa lucca sin il trassé previs, vegn il UCB ad examinar da spustar il tunnel pli lunsch en la muntogna.
Lavurs en lieus exponids duran anc fin la fin da l'atun 2026
Tut tenor il lieu vegnan las lavurs da sondagi fatgas cun maschinas a tschinta u cun indrizs staziunars. Ils sondagis main profunds en il sectur dals dus portals a Segl/Föglias (portal ost) e Plaun dal Crot (portal vest) han gia pudì vegnir terminads ils ultims 2 mais.
En lavur èn anc ils sondagis pli profunds en lieus per part isolads ed exponids. Las analisas geologicas duain previsiblamain vegnir terminadas l'atun 2026.
Segirada da la via dal Malögia a lunga vista
Las analisas actualas n'èn anc betg il cumenzament da las lavurs da construcziun dal tunnel Lai da Segl. Anzi, ussa ramassa il UCB las infurmaziuns necessarias davart il sutterren, per pudair giuditgar en moda fundada la realisabladad tecnica ed ils ulteriurs pass dal project.
Ils scleriments stattan en connex cun la segirada da la via dal Malögia a lunga vista. Per lung dal Lai da Segl exista cunzunt durant l'enviern ina periclitaziun tras lavinas e durant la stad tras bovas sco er tras crudadas da crappa e da blocca. Ils ultims onns ha la via perquai adina puspè stuì vegnir serrada per pliras uras.
Cun il tunnel previs duai la via vegnir spustada duraivlamain or dal sectur periclità. La finamira è d'obtegnair ina colliaziun segira per lung dal Lai da Segl, ch'è sche pussaivel disponibla durant l'entir onn.
Fotografias agiuntadas:
Maletg 1: Lavurs da sondagi cun maschinas grevas previsas per sondagis pli profunds en il territori stip e maltransibel.
© Cédric Wellinger, Caprez Ingenieure SA, Silvaplauna
Maletg 2: Transports aviatics da material cun l'helicopter. Raits cunter crudadas da crappa sur la plattafurma per segirar las lavurs da sondagi.
© Cédric Wellinger, Caprez Ingenieure SA, Silvaplauna
Maletg 3: Sche pussaivel vegni lavurà cun maschinas da sondagi levas sin plattafurmas mobilas che schanegian la cuntrada.
© Foto: Cédric Wellinger, Caprez Ingenieure SA, Silvaplauna
Maletg 4: Grafica: Trassé previs per il tunnel Lai da Segl.
Infurmaziuns:
Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 14.00 fin las 16.00), e‑mail Reto.Knuchel@tba.gr.ch
Responsabladad: Uffizi da construcziun bassa