En il rom da la Nova politica regiunala da la Confederaziun (NPR) ha la Regenza concedì a l'interpresa d'infrastructura Plazza aviatica regiunala Samedan in emprest da la Confederaziun da 6 milliuns francs per renovar la plazza aviatica regiunala Samedan (etappa 2a). Sin basa da la Lescha per promover il svilup economic en il chantun Grischun ha ella ultra da quai deliberà ina contribuziun chantunala da 4,61 milliuns francs sut il titel «infrastructuras relevantas per il sistem» sco er ina prestaziun equivalenta a l'emprest NPR da tut en tut 1,39 milliuns francs. Per il project èn budgetads custs da var 68,5 milliuns francs.

L'etappa 2a da la renovaziun da la plazza aviatica regiunala Samedan cuntegna il remplazzament dals edifizis da la plazza aviatica sco er la renovaziun da l'infrastructura relevanta per il manaschi. L'etappa cumpiglia pia l'edifizi da manaschi inclusiv il restaurant per visitadras e visitaders e la plazza da giugar, l'avantpista, plazzas d'atterrar per helicopters e differentas ulteriuras infrastructuras sco l'implant da tancar, l'infrastructura per la protecziun da la duana e dals cunfins, la plazza da parcar, l'access ed ina saiv enturn l'areal da la plazza aviatica. Il project duai vegnir realisà ils onns 2026 fin 2031.

La populaziun da las 11 vischnancas da l'Engiadin'Ota che portan l'interpresa d'infrastructura Plazza aviatica regiunala Samedan, ha acceptà quest project a chaschun da la votaziun dal pievel dals 17 d'avust 2025 e garantì per quest intent in credit d'impegn da 38 milliuns francs, in'empermischun da garanzia per credits da 20 milliuns francs prendids si tar terzs sco er ina gulivaziun da la chareschia futura. La populaziun da la vischnanca da San Murezzan ha ultra da quai approvà in credit d'impegn da 5 milliuns francs.

 

Infurmaziuns: Departament d'economia publica e fatgs socials

La Regenza ha concludì in'adattaziun dal Plan directiv chantunal en il sectur «Traffic» ed approvà l'adattaziun dal Plan directiv regiunal en il sectur «Traffic sin via», che la regiun Malögia aveva concludì ils 10 da zercladur 2026.

Cun questas adattaziuns dal Plan directiv chantunal e regiunal vegnan ils projects ch'èn planisads per renovar la via dal Malögia, segirads en la planisaziun territoriala. Ils corridors necessaris cun ils portals dal tunnel, cun ils access a la via e cun ulteriurs stabiliments appartegnents vegnan determinads en moda lianta. Els vegnan coordinads cun auters projects che han in effect sin il territori sco er cun ils interess da la Confederaziun, dal chantun e da las vischnancas. Per las planisaziuns consecutivas vegnan plinavant fixadas mesiras liantas per garantir la qualitad, uschia ch'ils projects vegnan concepids optimalmain ed integrads fitg bain en la cuntrada.

Per las regiuns da cunfin da l'Italia è la via dal Malögia la pli impurtanta ruta d'access en l'Engiadin'Ota. Ed entaifer la Svizra è ella l'unica colliaziun en la Val Bregaglia. Ord vista da la segirezza dal traffic sco er dal standard da construcziun na correspunda questa axa stradala, ch'è economicamain impurtanta, betg pli a las pretensiuns d'ozendi. Per lung dal traject, nua ch'il tunnel Lai da Segl è previs, è l'Uffizi da construcziun bassa gia vi da far analisas cun vasts scleriments geologics dal sutterren (communicaziun a las medias dals 28 d'avust 2026). Cun il tunnel previs duai la via vegnir spustada en il futur duraivlamain or dal sectur periclità.

Infurmaziuns: Departament d'economia publica e fatgs socials

La Regenza ha garantì a la vischnanca da Val Stussavgia ina contribuziun chantunala da maximalmain 655 479 francs per renovar l'access al bain puril Grafa. Ils custs imputabels dal project importan var 2,2 milliuns francs. La premissa per la contribuziun chantunala è il pajament d'ina contribuziun tras la Confederaziun. Ella subvenziunescha il project previsiblamain cun maximalmain 794 520 francs.

La sanaziun e la renovaziun da l'access al bain puril Grafa (via champestra Grafa) en la vischnanca da Val Stussavgia è in project da meglieraziun agricul impurtant per garantir a lunga vista l'access e la gestiun dals manaschis agriculs dal lieu.

 

© Ingenieurbüro Cavigelli AG, Ilanz

Infurmaziuns: Departament d'economia publica e fatgs socials