Cun la festa da ventschida è vegnì cuntanschì in term impurtant da la construcziun dal nov Center da scola auta spezialisada dal Grischun a Cuira. La construcziun brutta è a fin e l'edifizi a la Pulvermühlestrasse sa concretisescha. Il nov edifizi vegn a porscher localitads ed infrastructuras modernas per studegiar e perscrutar. La retratga è planisada per mez da l'onn 2028.

In onn e mez suenter l'emprima badigliada è terminada la construcziun brutta dal nov Center da scola auta spezialisada dal Grischun a la Pulvermühlestrasse a Cuira. L'Uffizi da construcziun auta ha perquai envidà a la festa da ventschida. En quest connex han ins cunzunt undrà la lavur da las mastergnantas e dals mastergnants sco er da las persunas responsablas per la planisaziun e construcziun. A chaschun da la festa han ins dà in sguard cuminaivel sin il progress da las lavurs da construcziun dals ultims mais ed a medem temp sin las proximas etappas.

Project impurtant per la Scola auta spezialisada
Il nov edifizi da la Scola auta spezialisada è in dals pli gronds projects da construcziun auta dal chantun. «Il progress rasant da las lavurs da construcziun è impressiunant, il plazzal sa mida dad emna ad emna. Las dimensiuns e la gronda cumplexitad dal project èn impressiunantas», di la cussegliera guvernativa e scheffa dal Departament d'infrastructura, energia e mobilitad Carmelia Maissen. Tras il nov edifizi persistent vegnan l'instrucziun e la perscrutaziun unidas en l'avegnir en in nov campus per las studentas ed ils students sco er per las collavuraturas ed ils collavuraturs. Oz è la Scola auta spezialisada dal Grischun repartida sin tschintg lieus en nov edifizis entaifer la citad da Cuira.

Il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, accentuescha l'impurtanza dal nov edifizi a lunga vista per la furmaziun, la perscrutaziun ed il svilup da l'economia locala: «Cun il nov Center da scola auta spezialisada stgaffin nus cundiziuns idealas per in barat interdisciplinar e purschain spazi per projects innovativs e novs concepts – a favur da la giuventetgna, da l'economia e da la societad dal Grischun.»

Engraziament a tut las persunas participadas
Tar la construcziun brutta han tut ils plauns sura survegnì palantschieus sura da lain cumbinà cun betun, sco er travs dublas or da lain grischun. «In project da tala dimensiun pretenda da tut las persunas participadas gronda precisiun, coordinaziun ed engaschament. La festa da ventschida è in term impurtant ed il medem mument in'occasiun d'engraziar a tut las persunas participadas per lur engaschament», explitga l'architect chantunal Andreas Kohne. Quest engraziament vegn er exprimì da Marc Grünenfelder, il president dal cussegl da scola auta da la Scola auta spezialisada dal Grischun.

Ils proxims pass
Sco proxim vegnan la fatschada da lain e las fanestras montadas, per serrar ermeticamain l'edifizi fin il cumenzament dal 2027. Il medem mument cumenzan las installaziuns tecnicas ed ils ulteriurs pass da cumplettaziun en l'intern. Sche tut va tenor plan, po il nov Center da scola auta spezialisada vegnir retratg mez da l'onn 2028. Ils custs per il project general – inclusiv la renovaziun da l'immobiglia a la Pulvermühlestrasse 68 – importan 178 milliuns francs. Il Cussegl grond ha approvà il credit d'impegn da 151 milliuns francs l'october 2022, il pievel grischun ha acceptà il project il mars 2023.

Agiunta:

Flyer d'infurmaziun davart la construcziun

Dapli infurmaziuns:

Tut las infurmaziuns davart il project èn da chattar qua.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 14.30 fin las 15.00), e-mail Jondomenic.Parolini@ekud.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 13.00 fin las 14.00), e‑mail Andreas.Kohne@hba.gr.ch

Responsabladad: Uffizi da construcziun auta

Cronica dal Center da scola auta spezialisada dal Grischun:

• Favrer 2015: Incumbensa dal Cussegl grond a la Regenza da far scleriments per construir in center da scola auta per la SASGR (l'anteriura Scola auta da tecnica ed economia [SATE] Cuira) e da suttametter al Cussegl grond in project cun in credit da construcziun.
• 2017–2020: En ses program 2017–2020 fixescha la Regenza da promover cun prioritad in tala construcziun.
• October 2018: Il Cussegl grond approvescha la realisaziun d'in center da scola auta a la Pulvermühlestrasse a Cuira.
• November 2020: A chaschun da la votaziun dal pievel dals 29 da november 2020 acceptan las votantas ed ils votants da Cuira la midada da zona e la cessiun da terren da la citad da Cuira.
• Settember 2020 – october 2021: Realisaziun d'ina concurrenza da projects selectiva da dus stgalims
• October 2021: La Regenza surdat l'incumbensa per il nov Center da scola auta spezialisada dal Grischun al team da planisaders generals dal project «Partenaris» sut la direcziun dal biro d'architectura Giuliani Hönger Architekten da Turitg. Els han gudagnà la concurrenza da projects da dus stgalims.
• October 2022: Il Cussegl grond approvescha il credit d'impegn da 151 milliuns francs per realisar il nov Center da scola auta spezialisada.
• Mars 2023: Il pievel grischun accepta cun passa 83 pertschient da las vuschs il project «Realisaziun dal Center da scola auta spezialisada dal Grischun». Il project cumpigliava in credit d'impegn da 151 milliuns francs. Las investiziuns totalas per il project general, inclusiv la renovaziun da l'immobiglia a la Pulvermühlestrasse 68, duain importar var 178 milliuns francs.
• Mars 2024: Il chantun, respectivamain l'Uffizi da construcziun auta cumpetent, inoltrescha la dumonda da construcziun a la citad da Cuira.
• Zercladur 2024: La citad da Cuira dat la permissiun da construcziun al chantun respectivamain a l'Uffizi da construcziun auta cumpetent.
• 28 da november 2024: Emprima badigliada per il nov Center da scola auta spezialisada (CSASGR)
• 20 da schaner 2025: cumenzament da las lavurs da construcziun
• 10 da settember 2026: Festa da ventschida