En il rom da sia strategia d'immobiglias ha la Regenza prendì la decisiun da princip per construir in nov edifizi per la Polizia chantunala a la Ringstrasse a Cuira. Ultra dal commando duai er vegnir integrada la centrala d'acziuns ch'è activa di e notg.

L'edifizi actual da la Polizia chantunala a la Ringstrasse 2 da l'onn 1969 mussa in basegn considerabel da renovaziun e d'adattaziun. Ultra dals deficits en connex cun la segirezza cunter terratrembels èn er ils mirs exteriurs antiquads, las surfatschas occupadas cumplettamain e las pretensiuns envers la lavur da la polizia creschidas. Ina sanaziun chaschunass blera lavur e gronds custs areguard la tecnica ed il manaschi ed adempliss mo per part las pretensiuns futuras.

In edifizi nov sper l'edifizi actual da la Polizia chantunala garantescha percunter a lunga vista la disponibladad e la segirezza dal manaschi da la centrala d'acziuns sco infrastructura critica, optimescha ils process da lavur e d'acziun e meglierescha la collavuraziun. La tecnica d'edifizis moderna e las surfatschas optimadas creeschan ultra da quai las premissas per in manaschi economic e persistent.

L'edifizi existent po vegnir duvrà vinavant en il futur sco edifizi administrativ senza infrastructura critica da l'Uffizi per il traffic sin via (UTV) e da differents posts da servetsch chantunals. Uschia valan pretensiuns pli bassas envers terratrembels, quai che permetta ina renovaziun pli effizienta e favuraivla cun locals che pon vegnir utilisads en moda flexibla. La cuntinuitad funcziunala per il UTV resta garantida al lieu vertent. Plinavant èsi pussaivel da cuvrir per gronda part ils basegns da spazi da la segunda etappa dal center administrativ «sinergia», che n'è betg vegnida realisada fin ussa.

Sco proxim fa l'Uffizi da construcziun auta scleriments pli detagliads per quest project ed examinescha ulteriuras sinergias pussaivlas. Suenter duai vegnir elavurada ina missiva da construcziun e preschentada al Cussegl grond.

Infurmaziuns: Departament d'infrastructura, energia e mobilitad

La Regenza ha approvà il project d'exposiziun per la correcziun da la Landwasserstrasse sin il traject tranter Spinabad e Wildmatta en la vischnanca da Tavau. Tut en tut custa il project circa 14,9 milliuns francs.

La Landwasserstrasse è la colliaziun tranter Casti e Tavau tras la Val d'Alvra ed il Landwassertal, che vegn utilisada da turists sco er dal traffic d'excursiuns, da pendularis e da lavur. En situaziuns excepziunalas serva la via er sco ruta da guntgida da la via d'apport principala che collia Landquart e Tavau tras il Partenz.

Il project qua avant maun pertutga il traject da la Landwasserstrasse tranter Spinabad e Wildmatta a Davos Glaris. En il perimeter da quest project traversan la lingia da la Viafier retica sco er la Landwasserstrasse l'aual da la Landwasser. Questas duas punts – la punt existenta da la lingia da la Viafier retica SA sco er la punt da la Landwasser Glaris – èn vegnidas construidas il 1955 ed èn pia circa 70 onns veglias. La punt da la viafier è en in nausch stadi, ha ina statica insuffizienta e sto vegnir renovada. Plinavant na correspunda il profil interiur existent betg pli a las pretensiuns actualas da la Viafier retica. La punt da la Landwasser Glaris existenta ha deficits statics e n'è betg avunda lada. En il rom da l'examinaziun èsi vegnì decidì, da remplazzar questas duas punts cun ina nova construcziun. Il trassé da la via projectada correspunda per part al trassé existent. En il sectur da la punt da la Landwasser vegn il trassé situà en l'ost da la punt da la Landwasser resp. da la punt da viafier actuala, quai pervia da ponderaziuns davart il profil interiur da la Viafier retica e davart las fasas da construcziun. Tenor las basas da projectaziun da l'Uffizi da construcziun bassa vegn il profil traversal da la via dimensiunà uschia, ch'el tegna quint da la funcziun da la via, dal volumen da traffic e dals basegns da tut las participantas e participants dal traffic. La punt existenta da la Landwasser vegn demontada suenter la terminaziun da la nova punt.

Infurmaziuns: Departament d'infrastructura, energia e mobilitad

La Regenza grischuna engrazia a la Regenza dal chantun Turitg per il grond sustegn finanzial, che vegn danovamain prestà or dal Fond d'utilitad publica a favur da quatter projects en il chantun Grischun. Las contribuziuns a quests projects d'infrastructura en differentas regiuns ed en divers territoris linguistics èn da gronda impurtanza per la realisaziun dals projects respectivs.

Ils uschenumnads «Projects d'agid en Svizra 2026» dal chantun Turitg resguardan ils suandants projects en il chantun Grischun: ils donns da malaura dals 21 da zercladur 2024 (344 000 francs), la protecziun cunter aua gronda da la Val da Schluein (344 000 francs), las cuntradas d'ischis da muntogna e da bostgs da biotop en il Partenz (154 000 francs) sco er ils mirs sitgs per lung da la via da communicaziun istorica al Pass dal Lucmagn (286 000 francs).

Infurmaziuns: Departament d'educaziun, cultura e protecziun da l'ambient

La Regenza ha elegì Márcia Cristina da Fonseca Lopes Figueiredo e Rachel Brunnschweiler per cumplettar sco novas commembras la Cumissiun d'integraziun, quai per la perioda d'uffizi che dura fin ils 31 da fanadur 2030.

Sco gremi spezialisà represchenta la Cumissiun d'integraziun ils pli impurtants champs d'integraziun dal chantun. Ella ha ina funcziun consultativa areguard temas ch'èn relevants per l'integraziun e gida a fixar ils accents da la promoziun chantunala d'integraziun.

Infurmaziuns: Departament da giustia, segirezza e sanadad