Venderdi, ils 30 d'october 2026, è vegnida inaugurada festivamain la nova punt dal St. Petersbach tranter Meierhof e Tobel. Cun ina purtada principala da var 46 meters remplazza la construcziun la traversada existenta dal Schlettertobel e meglierescha il trassé sco er la segirezza dal traffic.
La via da Sursaissa è ina via chantunala da colliaziun. Suenter Glion sa sparta ella da la via da la Lumnezia e renda accessibels ils lieus da la flanca dretga da la part sut da la Surselva. Las fracziuns Meierhof e Tobel sa chattan da tuttas duas varts dal Schlettertobel ed èn colliadas cun la punt dal St. Petersbach.
Motivs per la nova punt e construcziun durant ch'il traffic circulava
La via existenta era memia stretga, la cuvrida donnegiada e la punt existenta en in nausch stadi. In'adattaziun per lung dal trassé da fin ussa avess chaschunà blera lavur e gronds custs, perquai che la costa è instabila e las stortas stretgas. Plinavant avess quai duvrà punts a spunda massivas u auts mirs da sustegn. Per quest motiv è l'Uffizi da construcziun bassa sa decidì da curreger il trassé e da construir ina nova punt cun ina purtada principala da circa 46 meters. Durant las duas stagiuns da construcziun han ins uschia pudì laschar circular il traffic praticamain senza restricziuns sin la via existenta.
Construcziun durabla
La nova punt dal St. Petersbach è ina construcziun cumbinada d'atschal e da betun. Duas travs-chascha d'atschal portan la platta da betun fina. La structura purtanta da la punt è concepida sco construcziun sparunada cun sustegns sin duas pitgas. La construcziun desista da passadis da vials e da pusals mecanics. Plinavant na dovra l'atschal utilisà nagina ulteriura protecziun cunter corrusiun, perquai ch'el è resistent a l'aura. Quai reducescha en l'avegnir ils custs da mantegniment: «Nus avain tschernì ina construcziun robusta, che dovra a medem temp uschè pauca lavur da mantegniment sco pussaivel», declera l'inschigner chantunal Reto Knuchel.
Meglieraments per il traffic da peduns e da bus
La nova punt fa part d'in project d'adattaziun da la via da Sursaissa sin ina lunghezza da circa 490 meters. Sin giavisch da la vischnanca vegn construì per lung da l'entir perimeter in nov passape. Cun quai vegnan meglieradas las cundiziuns per las pedunas ed ils peduns. Er las fermadas da bus vegnan posiziunadas da nov e sa chattan a l'entrada da Tobel. En omaduas direcziuns da viagiar vegnan ellas concepidas sco uschenumnadas fermadas da cap. En il sectur da la fermada vegn il vial limità uschia, ch'i n'è betg pussaivel da surpassar ils bus che sa ferman. Quai augmenta la segirezza durant ch'ils passagiers entran e sortan.
«Il nov passape e las fermadas da bus adattadas èn cumplettaziuns impurtantas da la punt nova. Els megliereschan la segirezza e rendan pli attractiva la colliaziun tranter Meierhof e Tobel er per la glieud che va a pe ubain cun il bus», di il president communal Ernst Sax.
Ils custs per la nova punt cun las construcziuns respectivas importan var 7,5 milliuns francs. Las ulteriuras lavurs en il rom da la correcziun da la via vegnan previsiblamain terminadas l'onn 2028.
Fotografia:
La nova punt dal St. Petersbach tranter las fracziuns Meierhof e Tobel
Agiunta:
Info dal UCB dals 30 d'october 2026
Auskunftspersonen:
- Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 12.00 fin las 14.00), e‑mail Reto.Knuchel@tba.gr.ch
- Ernst Sax, president communal da Sursaissa Mundaun, tel. +41 76 433 43 71, e‑mail ernst.sax@Obersaxenmundaun.swiss
Responsabladad: Uffizi da construcziun bassa