La Regenza ha decidì da publitgar l'emprima concurrenza uffiziala per surdar contribuziuns chantunalas tenor la Lescha davart la promoziun e la finanziaziun da mesiras per la protecziun dal clima e l'innovaziun en il Grischun (LGCI). 

En il rom da questa publicaziun uffiziala pon interpresas da differentas branschas inoltrar lur projects per installar ina pumpa da stgaudar industriala a temperatura auta per producir la chalur da process. Ellas pon dumandar ina contribuziun chantunala da maximalmain 800 000 francs per quest intent. Ils projects ch'èn legitimads da sa participar vegnan valitads ed alura rangads a maun dals criteris e dal schema da valitaziun. Il chantun promova maximalmain 10 projects en il rom da questa publicaziun. Projects pon vegnir inoltrads fin ils 26 d'avrigl 2027 (bul postal).

En il Grischun datti anc en numerus manaschis – per exempel en l'industria da victualias, en il sectur da sanadad u en manaschis industrials generals – ina ferma dependenza da sistems da stgaudar fossils per producir la chalur da process. Per bleras applicaziuns ch'èn usitadas en quests secturs economics èn las pumpas da stgaudar a temperatura auta ina pussaivladad tecnicamain realistica ed energeticamain effizienta per midar ad ina chalur cun paucas emissiuns.

Questa concurrenza duai gidar, ch'interpresas na remplazzian betg mo in ad in ils indrizs da producir la chalur da process existents, mabain ch'ellas examineschian concepts generals innovativs. Qua tras resultan impuls da ponderar da nov ils sistems da chalur e da duvrar pumpas da stgaudar a temperatura auta. La promoziun finanziala dal chantun po minimar las investiziuns inizialas pli grondas da tals sistems e meglierar uschia cleramain la rentabilitad dals sistems, en spezial er en cumparegliaziun cun la chalur da process che vegn producida directamain cun electricitad. Qua tras vegni pli attractiv per l'economia da realisar tals sistems, ed il provediment da chalur vegn a medem temp pli spert effizient e favuraivel al clima.

L'Uffizi d'ambient porscha ils 19 da schaner 2027 in webinari per preschentar la publicaziun uffiziala. Il link a l'occurrenza e las uras vegnan publitgads sin la pagina d'internet: www.gr.ch/greendeal-foerderung

Sin questa pagina d'internet chattais Vus plinavant ulteriuras infurmaziuns ed ils documents per inoltrar projects.

Infurmaziuns: Departament da furmaziun, ambient e cultura

A partir dal 1. da schaner 2027 publitgescha il chantun Grischun tut las proceduras da consultaziun publicas sin sia nova plattafurma dad e-participaziun. Sin questa plattafurma digitala pon persunas interessadas s'infurmar facilmain, endatar ina posiziun en moda structurada, envidar autras commembras e commembers dal team da sa participar a formular la posiziun e transmetter quella en furma electronica. Tgi che preferescha d'inoltrar la posiziun sin palpiri, po far quai er vinavant. La procedura da consultaziun è ina da las pitgas fundamentalas dal process democratic per furmar in'atgna opiniun e prender decisiuns. En questa fasa pon las persunas interessadas s'exprimer davart sbozs da planisaziun e da lescha da la Regenza u da l'administraziun. 

En il rom da la fasa da pilot èn differentas consultaziuns vegnidas testadas cun success sur la plattafurma dad e-participaziun dal chantun, tranter auter la consultaziun tar il «Plan directiv Energia», il sboz per la revisiun parziala da la legislaziun chantunala da pestga, il project per ina Lescha d'uffants e da giuvenils dal Grischun (LUG) u il sboz per meglierar l'abilitad d'agir dal Cussegl grond e da la Regenza en situaziuns excepziunalas.

Link a la plattafurma dad e-participaziun

Infurmaziuns: Chanzlia chantunala