Tge capita, sch'ina candidata u in candidat sorta – suenter l'elecziun – da la partida, a la quala ella u el appartegneva tenor la glista, u entra schizunt en in'autra partida?

Midadas, sortidas u exclusiuns da la partida n'han da princip naginas consequenzas giuridicas per la persuna pertutgada areguard sia commembranza en il parlament. La persuna pertutgada resta pia commembra dal Cussegl grond. Quai vegn giustifitgà dal Tribunal federal e da la giurisprudenza vertenta cun la protecziun da las deputadas e dals deputads tras il scumond d'instrucziuns (art. 161 Cst.), tras la libertad d'opiniun e d'infurmaziun (art. 16 Cst.), tras la libertad d'associaziun (art. 23) e tras l'elecziun limitada a la durada d'uffizi (cf. Weber Anina, Schweizerisches Wahlrecht und die Garantie der politischen Rechte, diss. Turitg 2016, p. 304 s.). Exceptadas da quai èn midadas da partida che signifitgan in grev engion da las persunas cun dretg da votar. In grev engion po p.ex. esser avant maun, sche la decisiun da midar partida è vegnida prendida gia il mument da l'elecziun e sche las persunas cun dretg da votar n'èn betg vegnidas infurmadas en chaussa (cf. DTF 1C_223/2023).