Exposiziun per las scolas davart il tema «Pregiudizis e rassissem»
© Musée de l’Homme Paris
Discriminaziun e rassissem èn sfidas socialas per nossa societad che na sa ferman era betg davant la stanza da scola u la plazza da pausa. Bleras scolas e persunas d'instrucziun s'engaschan per ina convivenza plain respect vicendaivel en nossa societad multifara. Ellas tractan quest tema en l'instrucziun e lantschan activitads.
Il Post spezialisà per l'integraziun dal Grischun sustegna l'engaschi da las scolas superiuras, scolas medias e scolas professiunalas e da lur persunas d'instrucziun. El metta a disposiziun ad ellas gratuitamain la versiun ambulanta da l'exposiziun «Nus ed ils auters. Dal pregiudizi al rassissem» ed il material didactic correspundent en las linguas tudestg/rumantsch e tudestg/talian.
Las scolaras ed ils scolars survegnan in'invista en la problematica dal rassissem, sia istorgia e ses funcziunament. Els vesan il connex cun l'actualitad e s'avischinan a la dumonda impurtanta: Co vulain nus viver communablamain en nossa scola, cun nossas vischinas e noss vischins ed en nossa societad?
L'exposiziun che ha gì in grond resun è vegnida concepida dal Musée de l’Homme Paris. Silsuenter ha il Post spezialisà per l'integraziun da migrant:as e per la prevenziun da rassissem Friburg adattà ella a la situaziun en Svizra. El ha elavurà ina versiun ambulanta en collavuraziun cun il Museum d'art e d'istorgia da Friburg. Per iniziativa dal Post spezialisà per l'integraziun vegn l'exposiziun preschentada en il chantun Grischun da la primavaira 2023 enfin la fin dal 2024.
Per ulteriuras infurmaziuns stattan nossa collavuratura e noss collavuraturs gugent a Vossa disposiziun.
-
Rumantsch: Donat Albin, e-mail Donat.Albin@afm.gr.ch, telefon 081 257 30 09
- Talian: Dario De Simone, e-mail Dario.DeSimone@afm.gr.ch, telefon 081 257 21 43
-
Tudestg: Margot Heuberger, e-mail Margot.Heuberger@afm.gr.ch, telefon 081 257 26 02
Voss team dal Post spezialisà per l'integraziun
Infurmaziuns
Materiale pedagogico di accompagnamento