Integraziun è in tema cumplex che na pertutga betg mo migrantas e migrants, mabain nus tuts. I va per chattar in equiliber tranter la libertad individuala e la participaziun sociala. D'ina vart exista il privel da l'isolaziun sociala, da l'autra vart smanatscha ina «surintegraziun» che lascha pauc spazi per l'individualitad.

Integraziun na pon ins betg mo mesirar cun enconuschientschas linguisticas u cun success en la professiun. Anzi, ella è in process cuntinuant cun la finamira d'installar raits socialas e contacts tranter umans – tant immigrads sco er indigens. En quest connex sa tracti er d'analisar en moda critica nossas normas socialas e da sviluppar novas furmas da convivenza. L'integraziun promova avertadad e respect da tuttas duas varts ed è ina incumbensa da l'entira societad.

La publicaziun po vegnir legida qua online u vegnir chargiada giu sco PDF

Mix Magazin für Vielfalt 2026

Exemplars stampads pon vegnir empustads sut il numer 081 257 26 38 u per e-mail info@integration.gr.ch.

Editorial Felix Birchler, Incumbensà chantunal d'integraziun & manader PSI

Preziada lectura, prezià lectur

Jau hai gugent quels pitschens muments, cura che chapientscha vicendaivla reussescha sco da sez. Per exempel en la pasternaria. Ina clienta tschertga il dretg pled, mussa sin la pastizaria giavischada, il vendider mida dal dialect grischun en tudestg standard, omadus ston rir ed a la fin è la dretga pastizaria en il stgarnuz. Nagin tudestg perfetg, nagins gronds gests. E tuttina ha la communicaziun funcziunà. Talas situaziuns ma fan endament, quant bler che capita tranter ils pleds cun discurrer e chapir.

En nossa lavur tar il Post spezialisà per l'integraziun è la lingua in tema central. Nus accumpagnain persunas d'emprender uschè baud sco pussaivel ina lingua locala e da la duvrar en il mintgadi. La chapientscha vicendaivla na dependa dentant betg mo da las enconuschientschas da la lingua da la persuna visavi. Er autoritads, scolas, manaschis ed autras instituziuns ston sa dumandar, sche lur infurmaziuns vegnan recepidas e sch'ils discurs gartegian propi. Ina buna communicaziun è perquai adina ina incumbensa cuminaivla.

Il MIX actual tematisescha questa cumplexitad. Persunas raquintan da l'emprender tudestg e dal tudestg svizzer, da malchapientschas, da progress e d'inscunters surprendents. Nus dain in sguard sin curs da lingua ed en il mintgadi da lavur ed inscuntrain persunas, per las qualas la lingua signifitga bler dapli che mo in instrument: ella è part da lur biografia, da lur expressiun artistica u da lur sentiment d'appartegnientscha.

Forsa è quai la pli bella enconuschientscha da questa ediziun: La chapientscha vicendaivla na cumenza betg là, nua che la lingua è dal tuttafatg perfetga. Ella reussescha pir, cura che las persunas vegnan encunter ina a l'autra.

Ina lectura enritginta!

Felix Birchler
Incumbensà chantunal d'integraziun & manader PSI