Cun ses umor intelligent ed accentuà fascinescha Reena Krishnaraja il public da stand-up svizzer. In discurs davart eveniments absurds dal mintgadi e davart la dumonda agreabla dischagreabla davart sias «ragischs».

MIX: Reena Krishnaraja, Vus stais sco dunna giuvna cun gizs gieus da pleds sin las tribunas svizras. Cura avais Vus savì: Quai vi jau far professiunalmain?
Reena Krishnaraja (RK): L'idea d'instradar seriusamain la via da comedy è vegnida pass per pass. Per mia lavur da maturitad vuleva jau scriver in toc da teater, ma mes magister ha chattà quai memia pretensius – uschia sun jau sa tschentada tar il stand-up. Cura ch'i èn suandadas silsuenter emprimas invitaziuns da tribuna e l'onn 2022 il premi da newcomer «SRF 3 Best Talent Comedy», èsi daventà pli real. Durant in gentar en quella fasa ha mia scheffa da quel temp ditg – jau lavurava anc en in'agentura da marketing – confurm al senn: «Ussa è il mument perfetg. Fa quai!» Sin quai sun jau propi m'annunziada tar la cassa da cumpensaziun sco persuna cun activitad da gudogn independenta – ed ella è daventada mia managera (ri). Igl era impressiunant quants che cartevan en mai. Quai m'ha dà il curaschi necessari.

MIX: Vus essas creschida si a Grub en l'Appenzell, Voss geniturs èn arrivads là da la Sri Lanka. Sin questas «ragischs» vegnis Vus adina puspè pledentada. Co vesais Vus quai?
RK: Da princip ma legrel jau, sche umans èn mirveglius. La dumonda da la derivanza mussa gea er, quant cumplex ch'il tema patria è oz. En mia chasa paterna per exempel era oravant tut la Sri Lanka preschenta, en scola percunter la Svizra. Questa tensiun enconuschan bleras secondas ed jau resent quai sco enritgint. Sch'i ma vegn dà d'encleger cun la dumonda da derivanza che jau sun «autra» e che jau stoss ma giustifitgar che jau sun naschida e da chasa qua, lura daventi difficil …

MIX: Co influenzescha la tensiun menziunada Voss mintgadi?
RK: L'experientscha schlargia mia vista. Era sch'i po chaschunar fricziun en mes intern, èn dus caracters culturals oravant tut in stgazi enorm. Per mia lavur da tribuna è quai in vair tresor. Jau fatsch plinavant l'experientscha che jau pos prender uschia pli facilmain differentas perspectivas e forsa er esser pli empatica.

MIX: Sco dunna sin tribuna – tant pli cun ina biografia da migraziun – vegnis Vus mintgatant categorisada politicamain. È quai ina chargia u ina schanza?
RK: Omaduas chaussas. Sch'ins ha en mes job in profil che sa distingua, è quai bun. Mintgatant resent jau dentant, sco sche jau stuess represchentar suletta in'entira gruppa sin tribuna – las dunnas, las migrantas, ils giuvens. Da l'autra vart dattan ins durant tschertas sairas er propi en egl sco unica u sco ina da las paucas cumediantas femininas. Igl è uman da pensar en truclets – jau fatsch er quai. Decisiva è la dumonda, sch'ins sa dat la fadia da vesair umans en moda differenziada suenter l'emprim reflex. Er perquai emprov jau da giugar cun clischés – e d'als rumper.

MIX: A propos temas da tribuna. Co chattais Vus els e co elavurais Vus els per las preschentaziuns?
RK: Savens basta in'experientscha da mintgadi absurda che m'occupa e che jau cuntinuesch. Er or da discurs cun amias ed amis u en las medias socialas tract jau temas. Il pli gugent als emprov jau ad hoc sin tribuna. Sche insatge chatta bun'accoglientscha, ma nod jau chavazzins latiers. Pli baud gieva quai senza. Lain guardar ina giada, sche jau gughegel cun la vegliadetgna creschenta mo pli cun texts formulads davant il public (ri).

MIX: Vus accentuais che Vus na vulais betg mo duvrar tabus ruts per irritar cun umor. Pertge?
RK: Sco cumedianta dastg jau far mal, dentant betg esser arbitrara. Jau tematisesch gea er chaussas che vegnan u che vegnivan tabuisadas en la societad – en emprima lingia tschent jau dentant alura la dumonda pertge. In punct decisiv è er, sche jau sco aspectatura pudess rir sezza sur da quai. E sch'il rir vala la paina.

MIX: Vus studegiais sociologia, communicaziun e politica a Berna, a medem temp faschais Vus professiunalmain comedy. Quant enavant s'influenzeschan quests munds?
RK: En emprima lingia èsi ina sfida organisatorica (ri). Areguard il cuntegn sa cumpletteschan els bain. Il studi ma dat structura e gida a chapir connexs socials. La comedy è mes cuntrapol creativ – main structurà, percunter pli direct. A lunga vista vi jau cumbinar tuts dus, ma actualmain è mes focus pli fitg sin tribuna – er grazia al success.

MIX: Vus faschais er podcasts, scrivais columnas ed essas activa en las medias socialas. Nua As sentis Vus il meglier?
RK: Cleramain sin tribuna. Mo là resulta ina vaira interacziun. Ins senta il public, po esser spontan, dastga er ina giada far naufragi – ed ins vegn tuttina purtà. En auters lieus manca questa dinamica. Per mai viva comedy cleramain dal mument.

MIX: Co vivais Vus quai, sche Vus sesais ina giada sezza en il public?
RK: Tge duai jau dir ussa? Tadlar è per mai cleramain pli grev che discurrer (ri). Jau consumesch pli gugent comedy a chasa cun sitcoms e cun serias.

MIX: Per finir: Datti insatge che Vus dessas sin via a la Reena da 14 onns?
RK: Jau schess ad ella: Ti na stos betg esser silenziusa. Hajas curaschi dad esser sco che ti es – betg a chasa ina ed en scola l'autra. I dat avunda persunas che han gugent tai exactamain per quai che ti es tut. E: Jeggings n'èn betg chautschas (ri).

Intervista: Philipp Grünenfelder