Visiun

Nus vulain crear plivalurs concretas per il chantun Grischun, contribuind activamain a la rentabilitad ed a la transparenza. Per quest intent ans laschain nus manar dals princips da l'essenzialitad, da la proporziunalitad e da l'efficacitad.

Activitad

Sco organ independent e suprem ch'è responsabel per la surveglianza da finanzas sustegnain nus il cussegl grond resp. sia cumissiun da gestiun sco er la regenza a survegliar las finanzas. En il rom da nossa incumbensa legala controllain e cussegliain nus ils posts administrativs e las instituziuns ch'èn suttamess a nossa surveglianza.

Team

Tranter nus sezs tgirain nus ina relaziun colleghiala. Noss cumportament da team sa basa sin il respect, sin la confidenza e sin il sustegn vicendaivel.

Clientella

Per nossa clientella essan nus in partenari da fatschenta fidà. Nus tractain nossa clientella en moda onesta e cun respect e represchentain noss interess cun arguments suandabels e persvadents.

Communicaziun

Nus communitgain en moda clera e precisa ed infurmain a temp, tegnend quint da las adressatas e dals adressats.

Cumpetenza

Nus essan revisuras e revisurs renconuschids ed essan persunas da contact stimadas. Grazia ad ina scolaziun fundada ed ad ina furmaziun supplementara permanenta disponin nus d'enconuschientschas professiunalas vastas che nus applitgain per chattar soluziuns praticas.

Proceder

Nus controllain tenor ils princips da controlla renconuschids. Nus procedin en moda objectiva, ans referind a las ristgas ed a las finamiras. Quai faschain nus, resguardond las circumstanzas spezialas.

Concepziun

Las collavuraturas ed ils collavuraturs da la controlla da finanzas han sviluppà communablamain quest model directiv l'onn 2005 e l'han mess en vigur en moda festiva il schaner 2006.

Realisaziun

Da las maximas qua survart deducin nus indicaturs e mesiras concretas per realisar il model directiv en la pratica.

Cuira, december 2005