La communicaziun / prevenziun agescha sco center che registrescha, coordinescha ed elavurescha ils giavischs, las dumondas e las infurmaziuns da la populaziun. Ella garantescha ina circulaziun d'infurmaziuns cuntinuanta tranter la Polizia e la societad, tegna la populaziun al current davart svilups actuals, promova mesiras preventivas, meglierescha la conscienza per dumondas da segirezza e promova uschia la qualitad da viver.
Sco Center da cumpetenza per la lavur da publicitad e communicaziun interns prestain nus ina contribuziun decisiva per stgaffir in image professiunal da la Polizia chantunala dal Grischun e promovain la chapientscha e la confidenza da la publicitad en la lavur da la polizia. Uschia infurmescha il post da communicaziun en moda transparenta ed activa cun communicaziuns a las medias, cun conferenzas da medias e cun posts sin las medias socialas davart eveniments, acziuns e svilups da la polizia. Nus coordinain ed elavurain dumondas da las medias per garantir ina rapportaziun cumplessiva ed exacta. In servetsch da pichet da 24 uras vegn garantì entras trais pledadras e pledaders da medias en uffizi cumplain e pliras pledadras e plirs pledaders da medias da milissa. En la lavur da medias resguardain nus la protecziun da la persunalitad, il secret d'uffizi, la presumziun d'innocenza, la tactica da la polizia e la lavur d'inquisiziun.
Sur chanals da communicaziun interns – latiers tutga er in blog apprezià ch'è accessibel a l'entir corp – vegn ultra da quai prestada ina contribuziun impurtanta per infurmar las collavuraturas ed ils collavuraturs.
Nossas spezialistas e noss spezialists da la prevenziun ageschan cun in spectrum vast d'activitads: Ellas ed els sensibiliseschan per la segirezza sin vias e sin la via da scola, cusseglian Vus, per che Vus na daventias betg victima d'in crim e sustegnan giuvenils en lur svilup da daventar commembras e commembers de la societad cun senn da responsabladad.
Anita Senti, manadra da communicaziun
Contact per las medias: info@kapo.gr.ch / +41 81 257 79 50
Link temas actuals
Link prevenziun