Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna crai ch'i na saja betg pli pussaivel da realisar la refurma dal territori e la repartiziun dal chantun en regiuns per l'onn 2015. En sia ultima sesida ha la regenza ultra da quai prendì enconuschientscha d'in rapport davart l'execuziun da las prestaziuns supplementaras durant l'onn passà. 

La realisaziun da la refurma dal territori sa retardescha per in onn
La refurma dal territori en il chantun Grischun na po betg vegnir realisada sco previs oriundamain per il 1. da schaner 2015. Independentamain dal fatg, sch'il referendum ch'è vegnì prendì cunter la lescha generala da la refurma dal territori reussescha, è il temp suenter la scadenza dal termin da referendum dals 6 d'avust 2014 calculà memia stgars per realisar la refurma gia l'onn 2015. La realisaziun da la refurma dal territori dastgass sa spustar probablamain per in onn, quai vul dir fin l'onn 2016. Uschia pudessan sa schliar ils circuls e las corporaziuns regiunalas il pli baud per quest termin. Las autoritads ed ils organs correspundents ston garantir vinavant che lur incumbensas vegnan ademplidas confurm a l'urden. Las 11 regiuns novas pon exister pir cur che las basas giuridicas correspundentas entran en vigur (entrada en vigur a medem temp da la revisiun parziala da la constituziun chantunala e da las disposiziuns executivas da la refurma dal territori). 

Puspè dapli persunas che retiran prestaziuns supplementaras
Il dumber da las persunas che retiran prestaziuns supplementaras (PS) en il chantun è s'augmentà ulteriuramain durant l'onn passà (plus 3,4 pertschient). La regenza ha prendì enconuschientscha d'in rapport davart l'execuziun da las prestaziuns supplementaras l'onn 2013. Ils ultims 5 onns è il dumber da las persunas che retiran PS en il chantun Grischun s'augmentà per totalmain 15 pertschient. L'augment durant questa perioda dependa a trais quarts da las novas prestaziuns supplementaras tar la AVS.
Il quint da gestiun da las PS preschenta l'onn 2013 custs nets da circa 92,7 milliuns francs. Uschia èn s'augmentads ils custs nets da las PS durant l'onn da gestiun per mo 0,3 pertschient. Quai malgrà l'augment menziunà da las persunas cun dretg da retrair PS. La contribuziun da la confederaziun a las PS ha importà circa 23,8 milliuns francs.
Las prestaziuns supplementaras a la AVS ed a la AI gidan là, nua che las rentas da la AVS e da la AI ensemen cun las ulteriuras entradas e cun l'ulteriura facultad da las persunas assicuradas na tanschan betg per cuvrir ils custs minimals da la vita. Igl exista in dretg giuridic da survegnir prestaziuns supplementaras. Ellas n'èn betg prestaziuns d'assistenza u agid social. 

Studi da geotermia en la Val dal Rain grischuna ed en il Partenz davant
Il chantun Grischun lascha sclerir il potenzial per producir energia geotermica en la Val dal Rain grischuna sco er en il Partenz davant. La regenza ha approvà in studi che duai sclerir, sch'i pon vegnir realisadas ovras electricas geotermicas e/u implants per producir electricitad termica en questa regiun. Per obtegnair infurmaziuns correspundentas er per il spazi da Sargans fin Walenstadt, sa participescha il chantun Son Gagl al studi. Il project che serva exclusivamain ad intents da studi e da svilup per l'utilisaziun da la geotermia a favur da la producziun d'energia dura fin il matg 2015. La direcziun dal project ha l'uffizi d'energia e da traffic. 

Participaziun al program d'interreg "Rain alpin-Lai da Constanza-Rain aut" 2014 fin 2020
Il chantun Grischun sa participescha er durant ils onns 2014 fin 2020 al program d'interreg "Rain alpin-Lai da Constanza-Rain aut". La regenza ha prendì enconuschientscha dal program operaziunal da la nova perioda da promoziun ed ha approvà ina cunvegna davart la collavuraziun administrativa tranter ils partenaris dal program. Cun ils programs d'interreg promova l'uniun europeica la collavuraziun transcunfinala. En Svizra vegnan ils programs realisads en il rom da la nova politica regiunala. Il program d'interreg "Rain alpin-Lai da Constanza-Rain aut" 2014 fin 2020 cumpiglia mesiras che duain promover la furmaziun, la perscrutaziun ed il svilup sco er la cumpetitivitad regiunala. Ils temas centrals ecologics èn la promoziun da l'effizienza da las resursas e la reducziun da las emissiuns da gas cun effect da serra. Il chantun Grischun sa participescha als projects cun ina contribuziun annuala da 60 000 francs. 
 

Da vischnancas e da regiuns
  • Val Stussavgia: A la vischnanca da Val Stussavgia vegn garantida ina contribuziun da maximalmain 105 900 francs per construir da nov la serenera (ARA) Carrera ed ils conducts collectivs appartegnents. 

Projects da vias 
  • Via sursilvana, Schluein: Il project d'exposiziun per la correcziun da la via sursilvana, entaifer il vitg da Schluein, kilometers 18,50 fin 18,70 vegn approvà. La correcziun da la via cumpiglia in trassé levamain adattà, in schlargiament da la via sco er in passape per lung da l'ur vers la val. La punt tar il vallun da Schluein ed il sutpassadi "chasa Camenisch" vegnan remplazzads, e la colliaziun a Sagogn vegn concepida da nov.
  • Via sursilvana da la vart dretga dal Rain, Salez – Castrisch: Il project d'exposiziun per la correcziun da la via sursilvana da la vart dretga dal Rain Salez – Castrisch vegn approvà. Il project prevesa in schlargiament da la via ed in meglier trassé. La correcziun da la via sa chatta en il sectur d'ina ruta da sgol impurtanta dal "rinolof grond", ina spezia d'utschè-mezmieur zunt periclitada. Cun elavurar il project è pia vegnida fixada – ensemen cun l'incumbensà chantunal per ils utschels-mezmieur – ina distanza dal guaud impurtanta e degna da vegnir mantegnida per la colonia d'utschels-mezmieur.
Ultra da quai ha la regenza approvà 3,44 milliuns francs per lavurs da construcziun sin ils suandants trajects:
- via da Ftan: lavurs d'impressari per la correcziun da la via Pra da Punt – Saduas
- via da Samignun: lavurs d'impressari per la construcziun nova da la basa da l'uffizi da construcziun bassa a Samignun 


Gremi: regenza
Funtauna: rg chanzlia chantunala dal Grischun
Neuer Artikel