Las populaziuns grischunas da capricorns prospereschan bain ed èn s'augmentadas en differentas colonias. Per evitar populaziuns memia grondas regiunalas e consequenzas negativas respectivas entaifer la spezia, per il spazi da viver u sin autras spezias, è necessaria ina regulaziun pli ferma. Perquai ch'i sto cunzunt vegnir intervegnì pli fitg tar ils animals feminins, vegn introducì l'onn 2023 en differentas colonias ina chatscha per regular las chauras-capricorn.
En differentas colonias da capricorns cun populaziuns creschentas vegn realisà l'atun 2023 ultra da la chatscha da capricorns regulara ina chatscha per regular las chauras-capricorn. Las chatschadras ed ils chatschaders admess a questa chatscha dastgan sajettar duas chauras-capricorn betg lactantas. Per ch'i na dettia nagina concurrenza cun la chatscha da capricorns regulara, tar la quala ina chaura betg lactanta sto vegnir sajettada avant il buc, vegnan las chatschas manadas tras en differentas etappas u en spazis separads. Omaduas chatschas han lieu tranter il 1. d'october ed ils 15 da november e duran 20 dis per chatschadra u chatschader. En l'entir chantun vegnan 27 chatschadras e chatschaders admess a la chatscha per regular las chauras-capricorn. Uschia duain vegnir sajettadas 54 chauras (+22 %) dapli.
Premissas per la participaziun ed annunzia
Per pudair participar a la chatscha per regular las chauras-capricorn, ston chatschadras e chatschaders interessads gia avair fatg ina chatscha da capricorns en il chantun Grischun. Avant quant ditg che quai è stà il cas, na gioga nagina rolla. Ed er il temp da spetga per ina chatscha da capricorns futura na vegn betg influenzada. Chatschadras e chatschaders interessads pon uschia s'annunziar directamain suenter ina chatscha da capricorns exequida per regular la chatscha da chauras-capricorn. Sch'i entran dapli annunzias che quellas ch'èn necessarias per ademplir il plan da prelevaziun, decida la sort. L'autezza da las taxas per la patenta e da prelevaziun è reglada analogamain a la chatscha da capricorns regulara en l'Ordinaziun chantunala davart ils capricorns. L'annunzia vegn fatga tuttina sco per la chatscha da capricorns regulara dals 6 fin ils 22 da mars 2023 ed è gratuita. La publicaziun inclusiv las infurmaziuns detagliadas davart la chatscha per regular las chauras-capricorn stattan a disposiziun sin la pagina d'internet da l'Uffizi da chatscha e pestga.