L'uffizi da construcziun bassa dal Grischun vul cuntinuar a meglierar ses servetschs per la publicitad sco er la collavuraziun cun sias incumbensadas e cun ses incumbensads. Per quest intent ha l'uffizi fatg l'atun 2010 in'enquista tar ils biros da projectaziun, tar las interpresas sco er tar las furnituras e tar ils furniturs che han survegnì incumbensas da l'uffizi da construcziun bassa cun la finamira da vegnir a savair lur opiniun davart l'uffizi da construcziun bassa sco er davart sias collavuraturas e davart ses collavuraturs.

L'evaluaziun mussa plaschaivlamain in maletg dal tuttafatg positiv fin fitg positiv, saja quai en connex cun la liquidaziun d'incumbensas u cun la percepziun generala da l'uffizi da construcziun bassa. En ils champs d'endataziun averts èn vegnidas fatgas bleras remartgas ed indicaziuns constructivas. Las partiziuns da l'uffizi da construcziun bassa vegnan a registrar quellas e – sche pussaivel – ad instradar mesiras da meglieraziun.