Pervia dals numerus laviners da la vart sanestra da la val tranter Silvaplauna e Castasegna sto la via da Malögia vegnir serrada regularmain per motivs da segirezza. A lunga vista duai il problem vegnir schlià tras in tunnel. Fin lura procuran pitgas per siglientar lavinas per dapli segirezza. L'Uffizi da construcziun bassa ha cumenzà cun las lavurs necessarias.

Il traject da la via da Malögia tranter Segl-Föglias e Plaun da Lej ha ina lunghezza da 3,5 kilometers e sto savens vegnir serrà durant pliras uras e plirs dis pervia d'in privel da lavinas pli grond. La gronda periclitaziun da la via chantunala fatschenta perquai gia dapi plirs decennis il chantun, las vischnancas ed ulteriuras parts participadas en la regiun. La soluziun a lunga vista, che vegn persequitada actualmain, prevesa da construir in tunnel en cumbinaziun cun indrizs fixs per siglientar lavinas e cun rempars per proteger ils portals dal tunnel. Sin giavisch da las vischnancas e dal chantun èn vegnidas prendidas mesiras efficazias per reducir las ristgas durant il temp transitoric (communicaziun a las medias dals 24 da favrer 2022), quai pervia dal lung orizont da temp per realisar ina tala soluziun.

Pitgas per siglientar lavinas e surveglianza cun radar Ils 22 d'avust 2022 ha l'Uffizi da construcziun bassa cumenzà cun las lavurs da construcziun per questas mesiras intermediaras. Il project cumpiglia tranter auter la construcziun da pitgas per siglientar lavinas en ils secturs da la via, ch'èn periclitads il pli fitg da vegnir sutterrads. Las pitgas per siglientar lavinas vegnan construidas sapientivamain mo cun ancras senza betun, per ch'ellas possian vegnir reutilisadas en in auter lieu en il perimeter dal project, suenter che la soluziun definitiva è realisada, quai vul dir suenter ch'il tunnel previs è en funcziun.

En il rom dal project vegn ultra da quai installà in radar a lunga distanza per survegliar ils ulteriurs laviners che n'èn betg tangads da las pitgas per siglientar lavinas. Davent da l'autra vart da la val principala surveglia quest sistem d'alarm in areal da fin 10 kilometers quadrat. Uschia pon vegnir survegliads quasi tut ils laviners en il perimeter dal project. Il radar po pia er vegnir duvrà per controllar il success da las pitgas per siglientar lavinas.

Grazia a questas mesiras po vegnir cuntanschì in gudogn da segirezza signifitgant per las utilisadras ed ils utilisaders da la via. Las lavurs da construcziun èn planisadas uschia, che las pitgas per siglientar lavinas pon vegnir messas en funcziun gia il proxim enviern 2022/2023.